విజయవాడ నగరంలో తీవ్ర కలకలం రేపిన మెగా డీఎస్సీ ఉపాధ్యాయులపై దాడి ఘటనను ఏపీ పోలీస్ శాఖ అత్యంత తీవ్రంగా పరిగణించింది. ఇందిరా గాంధీ మున్సిపల్ స్టేడియం వద్ద ఉన్న స్పోర్ట్స్ అథారిటీ ఆఫ్ ఆంధ్రప్రదేశ్ కార్యాలయం సమీపంలో తమ న్యాయమైన డిమాండ్ల కోసం ప్రశాంతంగా నిరసన తెలుపుతున్న ఉపాధ్యాయులపై జరిగిన ఈ దాడి ఘటనపై ప్రభుత్వం, పోలీస్ ఉన్నతాధికారులు తీవ్ర ఆగ్రహం వ్యక్తం చేశారు. ప్రజాస్వామ్యబద్ధంగా ఆందోళన చేస్తున్న వారిపై భౌతిక దాడులకు తెగబడటం తీవ్రమైన నేరమని చెప్తున్న అధికారులు.. చర్యలు చేపట్టారు.
Also Read : టీచర్లపై దాడిలో అరాచక శక్తులు.. పోలీసుల దర్యాప్తులో విస్తుపోయే విషయాలు
ఈ నేపథ్యంలోనే నిందితులపై కఠిన చర్యలు తీసుకోవాలని, బాధ్యులైన వారిపై తక్షణమే రౌడీషీట్లు ఓపెన్ చేయాలని విజయవాడ నగర పోలీస్ కమిషనర్ ఎస్.వి. రాజశేఖర్ బాబు సంబంధిత పోలీస్ స్టేషన్ల హౌస్ ఆఫీసర్లకు అత్యవసర స్పష్టమైన ఆదేశాలు జారీ చేశారు. గతంలో గుంటూరు జిల్లా మంగళగిరిలోని టీడీపీ కేంద్ర కార్యాలయంపై జరిగిన హింసాత్మక దాడి కేసులో నిందితులుగా ఉంటూ, బెయిల్పై బయట తిరుగుతున్న వారందరిపై కూడా రౌడీషీట్లు తెరవాలని సీపీ రాజశేఖర్ బాబు తన ఉత్తర్వుల్లో పేర్కొన్నారు.
శాప్ కార్యాలయం వద్ద ఉపాధ్యాయులపై దాడికి తెగబడిన గుంపులో పాత కేసులకు సంబంధించిన నేర చరిత్ర కలిగిన నిందితులు ఉన్నట్లు ప్రాథమిక విచారణలో పోలీసులు నిర్ధారించారు. నగరంలో శాంతిభద్రతలకు విఘాతం కలిగించేలా ప్రవర్తించే వారు ఎంతటి వారైనా సరే ఉపేక్షించేది లేదని కమిషనర్ హెచ్చరించారు. సమాజంలో అశాంతిని రేకెత్తించే ఇలాంటి మూకలపై ఎలాంటి దాక్షిణ్యం చూపవద్దని, చట్టప్రకారం కఠినంగా వ్యవహరించి అదుపులోకి తీసుకోవాలని పోలీసు అధికారులను ఆదేశించారు.
Also Read : జగన్కు ఊహించని షాక్ ఇస్తున్న లోకేష్..!
నగర రక్షణే ధ్యేయంగా పోలీసులు ఈ కఠినమైన చర్యలకు పూనుకున్నారు. ఈ ఉత్తర్వుల ప్రకారం మొత్తం 51 మంది నిందితులపై వివిధ పోలీస్ స్టేషన్ల పరిధిలో రౌడీషీట్లు ఓపెన్ చేయడానికి రంగం సిద్ధమైంది. ఈ సుదీర్ఘ జాబితాలో వైఎస్సార్ కాంగ్రెస్ పార్టీ కి చెందిన ముఖ్య నేతలు, ఎమ్మెల్సీ తలసిల రఘురాం, దేవినేని అవినాష్ సహా పలువురు ప్రముఖ నిందితుల పేర్లు నమోదైనట్లు పోలీస్ వర్గాల ద్వారా సమాచారం అందుతోంది. గతంలో వారు పాల్గొన్న రాజకీయ ఘర్షణల చరిత్రను, అలాగే తాజా ఉపాధ్యాయుల అల్లర్ల తీవ్రతను పరిగణనలోకి తీసుకుని పోలీసులు ఈ నిర్ణయానికి వచ్చారు.