టైప్-1 మధుమేహంతో బాధపడే రోగులు ఇన్సులిన్ ఇంజెక్షన్లకు బదులుగా నోటి ద్వారా తీసుకునే మాత్రలు వాడటం అత్యంత ప్రమాదకరమని, అది ప్రాణాంతకంగా మారుతుందని ప్రముఖ వైద్య నిపుణులు హెచ్చరిస్తున్నారు. ప్రతిరోజూ సూదులతో గుచ్చుకోవడం వల్ల కలిగే శారీరక, మానసిక అలసట కారణంగా కొందరు రోగులు సొంత నిర్ణయాలతో మాత్రల వైపు మొగ్గుచూపుతున్నారు. ఇటీవల వెలుగుచూసిన ఒక తీవ్ర విషాదకర కేసులో, గత పదేళ్లుగా టైప్-1 డయాబెటిస్తో బాధపడుతున్న 26 ఏళ్ల యువకుడు ఇంజెక్షన్లు భరించలేక వాటిని పూర్తిగా ఆపేశాడు.
Also Read : పదవి కావాలంటే.. పని చేయాల్సిందే.. బాబు వార్నింగ్..!
తన బంధువు వాడుతున్న టైప్-2 మధుమేహం మాత్రలను దొంగతనంగా వేసుకోవడం ప్రారంభించిన కేవలం 24 గంటల లోపే ఆ యువకుడు రాత్రికి రాత్రే మరణించడం వైద్య ప్రపంచాన్ని తీవ్రంగా కలచివేసింది. టైప్-1 మరియు టైప్-2 డయాబెటిస్ చికిత్సల మధ్య ఉన్న జీవసంబంధమైన వ్యత్యాసాన్ని గ్రహించకపోవడమే ఆ యువకుడి ప్రాణాల మీదకు తెచ్చిందని ప్రముఖ ఎండోక్రినాలజిస్టులు డాక్టర్ అనూప్ మిశ్రా, డాక్టర్ అంబ్రీష్ మిథాల్ స్పష్టం చేశారు. టైప్-2 డయాబెటిస్ మాత్రలు క్లోమ గ్రంథిని ప్రేరేపించి ఉన్న కొద్దిపాటి ఇన్సులిన్ను విడుదల చేయడానికి మాత్రమే పనికొస్తాయి.
Also Read : రోహిత్ శర్మ రిటైర్మెంట్ రూమర్స్ కు బీసీసీఐ బ్రేక్..!
కానీ టైప్-1 డయాబెటిస్లో రోగనిరోధక వ్యవస్థ లోపం వల్ల ఇన్సులిన్ను ఉత్పత్తి చేసే బీటా కణాలు పూర్తిగా నశించిపోతాయి. అందువల్ల శరీరంలో అస్సలు ఇంధనం లేనప్పుడు మాత్రలు వేసుకోవడం అంటే ప్రాణాల మీదకు తెచ్చుకున్నట్లే అని.. దీనివల్ల ఇన్సులిన్ కొరత ఏర్పడి శరీరం క్షణాల్లో విషపూరితంగా మారుతుందని వైద్యులు వివరిస్తున్నారు. ఇన్సులిన్ ఇంజెక్షన్లు అకస్మాత్తుగా ఆపేయడం వల్ల డయాబెటిక్ కీటోఅసిడోసిస్ అనే ప్రాణాంతక అత్యవసర పరిస్థితి తలెత్తుతుందని నిపుణులు హెచ్చరిస్తున్నారు. దీనివల్ల రక్తంలో అసిడిటీ పెరిగిపోయి తీవ్రమైన డీహైడ్రేషన్, నోటి నుండి పండ్ల వాసన రావడం, శ్వాస తీసుకోవడంలో ఇబ్బంది మరియు స్పృహ కోల్పోవడం వంటి లక్షణాలు కొన్ని గంటల్లోనే తీవ్రమై గుండె, కిడ్నీలు ఫెయిల్ అవుతాయి.