అనుష్క శర్మ ఒక్క ఆర్డర్‌తో మారిన ముంబై హోటల్ రాత..!

ముంబైలోని చెంబూరు ప్రాంతంలో కేవలం మూడు టేబుళ్లు, 9 సీట్లతో ప్రారంభమైన ఒక చిన్న చోలే భటూరే హోటల్ అప్పుల ఊబిలో కూరుకుపోయి మూతపడే స్థితికి చేరుకుంది. జస్పాల్ సింగ్ ఖల్సా, మహీందర్ సింగ్ ఖల్సా అనే ఇద్దరు సోదరులు అక్టోబర్ 2021లో ప్రారంభించిన ఢిల్లీ సే అనే ఈ చిన్న అవుట్‌లెట్, వ్యాపారం సాగక 2022 సెప్టెంబర్ నాటికి దాదాపు రూ.18 లక్షల అప్పుల్లో పడిపోయింది. ఆఖరి నెల అద్దె, కిరాణా సామాను డబ్బులు కట్టేసి హోటల్‌ను శాశ్వతంగా మూసివేయాలని ఆ సోదరులు భావించారు.

Also Read : తెనాలి మాజీ ఎమ్మెల్యే గారి చీటింగ్ లీలలు..!

కానీ, వారు తీసుకున్న ఆఖరి నిర్ణయానికి ముందే ఒక అద్భుతం జరిగి వారి వ్యాపార రాతనే మార్చేసింది. మొదటగా ప్రముఖ స్టాండ్ అప్ కమెడియన్ అభిషేక్ ఉపమన్యు ఈ హోటల్‌ను సందర్శించి, ఇక్కడి చోలే భటూరే రుచి నచ్చి తన ఇన్‌స్టాగ్రామ్ స్టోరీలో షేర్ చేశారు. ఆ తర్వాత, ఢిల్లీ తరహా అసలైన చోలే భటూరే రుచుల కోసం వెతుకుతున్న బాలీవుడ్ నటి అనుష్క శర్మకు ఈ హోటల్ గురించి తెలిసింది. తన భర్త, స్టార్ క్రికెటర్ విరాట్ కోహ్లీకి ఇష్టమైన ఈ వంటకాన్ని ఆర్డర్ చేయడానికి ఆమె జుహూలోని తన నివాసం నుండి హోటల్‌కు ఫోన్ చేశారు.

Also Read : మొబైల్ వినియోగదారులకు ట్రాయ్ బంపర్ ఆఫర్..!

మొదట ఎవరో ప్రాంక్ కాల్ చేస్తున్నారని హోటల్ యజమాని జస్పాల్ భయపడినప్పటికీ, చివరకు అది విరాట్ కోహ్లీ ఇల్లేనని నిర్ధారించుకుని అక్టోబర్ 5, 2022న రెండు ప్లేట్ల చోలే భటూరేలను డెలివరీ చేశారు. ఆ ఆహారం తిన్న తర్వాత అనుష్క శర్మ ఎంతో సంతోషపడి, “ముంబైలో ఎట్టకేలకు అసలైన ఢిల్లీ లాంటి చోలే భటూరే దొరికాయి” అంటూ ఇన్‌స్టాగ్రామ్‌లో ఒక పోస్ట్ పెట్టారు. ఈ ఒక్క పోస్ట్‌తో ఆ హోటల్ వద్ద జనసందోహం ఒక్కసారిగా పెరిగిపోయింది, ఎంతలా అంటే గుంపును అదుపు చేయడానికి పోలీసులు రావాల్సి వచ్చింది.

అప్పటివరకు రోజుకు కేవలం అర కిలో లేదా ఒక కిలో చోలే వండే ఆ హోటల్‌లో, ఇప్పుడు రోజుకు ఏకంగా 125 కిలోల చోలే వండుతున్నారు. అప్పట్లో నెలకు కేవలం రూ.1 లక్ష నుండి రూ.1.5 లక్షల లోపు అమ్మకాలు సాగించే ఈ బ్రాండ్, ఇప్పుడు ముంబై వ్యాప్తంగా నాలుగు అవుట్‌లెట్లతో విస్తరించి, రోజుకు 3,000 ప్లేట్లకు పైగా విక్రయిస్తూ నెలకు దాదాపు రూ.2 కోట్ల టర్నోవర్‌తో దూసుకుపోతోంది.