నందమూరి అభిమానులకు మరోసారి పండగ వాతావరణం నెలకొంది. నటసింహం నందమూరి బాలకృష్ణ కేవలం తన పవర్‌ఫుల్ డైలాగులు, మాస్ డ్యాన్సులతోనే కాకుండా, మరోసారి తన గాత్రంతోనూ ప్రేక్షకులను అలరించడానికి సిద్ధమయ్యారు. బ్లాక్‌బస్టర్ వీర సింహారెడ్డి తర్వాత మాస్ డైరెక్టర్ గోపీచంద్ మలినేని దర్శకత్వంలో బాలకృష్ణ నటిస్తున్న తాజా చిత్రం దాదా. వృద్ధి సినిమాస్ బ్యానర్‌పై వెంకట సతీష్ కిలారు నిర్మిస్తున్న ఈ భారీ యాక్షన్ ఎంటర్‌టైనర్ నుంచి మ్యూజికల్ ప్రమోషన్లకు చిత్రబృందం శ్రీకారం చుట్టింది.
Also Read : ఎవరి బీ టీమ్ కాదు.. హామీ ఇస్తున్నా..!
ఈ సినిమాలోని మొదటి పాట దాదా ధమాకా కోసం మ్యూజిక్ సెన్సేషన్ ఎస్.ఎస్. తమన్ స్వరపరిచిన మాస్ బీట్‌కు బాలకృష్ణ స్వయంగా కొన్ని పవర్‌ఫుల్ లైన్స్ పాడినట్లు సినీ వర్గాలు వెల్లడించాయి. ఈ హై-వోల్టేజ్ ఫస్ట్ సింగిల్‌ను ఈ నెల 13న విడుదల చేయనున్నట్లు మేకర్స్ అధికారికంగా ప్రకటించారు. ఈ పాటకు సంబంధించిన అనౌన్స్‌మెంట్ పోస్టర్‌లో బాలకృష్ణ లెదర్ జాకెట్, సన్‌గ్లాసెస్ ధరించి చేతిలో గన్‌తో స్టైలిష్‌గా కనిపించగా, ఆయన పక్కన బాలీవుడ్ నటి నర్గీస్ ఫక్రీ గ్లామరస్ లుక్‌లో మెరిశారు.
Also Read : జగన్ అక్రమాస్తుల కేసుల్లో ఈడీ స్పీడ్..!
గతంలో పైసా వసూల్ సినిమాలో “మామా ఏక్ పెగ్ లా” పాట పాడి అభిమానులను ఉర్రూతలూగించిన బాలయ్య, ఇప్పుడు తమన్ మాస్ ట్యూన్‌కు గొంతు కలపడంతో థియేటర్లలో పూనకాలు రావడం ఖాయమని ఫ్యాన్స్ సోషల్ మీడియాలో సందడి చేస్తున్నారు. కాజల్ అగర్వాల్ కథానాయికగా నటిస్తున్న ఈ చిత్రంలో మంచు మనోజ్, సముద్రఖని, శరత్ కుమార్, అభిమన్యు సింగ్ తదితరులు కీలక పాత్రలు పోషిస్తున్నారు. సాయి మాధవ్ బుర్రా పదునైన సంభాషణలు అందిస్తుండగా, అరవింద్ ఎస్. కశ్యప్ సినిమాటోగ్రఫీ బాధ్యతలు నిర్వర్తిస్తున్నారు. భారీ అంచనాల మధ్య రూపొందుతున్న దాదా చిత్రం క్రిస్మస్ కానుకగా డిసెంబర్ 24న ప్రపంచవ్యాప్తంగా థియేటర్లలోకి రానుంది.
