‘ది ప్యారడైజ్’తో ఇటీవల ప్రేక్షకుల ముందుకు వచ్చిన నాని, తన తదుపరి చిత్రం ‘బ్లడీ రోమియో’పై దృష్టి పెట్టినట్లు సమాచారం. దర్శకుడు సుజీత్తో ఆయన చేయనున్న ఈ సినిమాపై ఇప్పటికే ఆసక్తి నెలకొంది. విడుదలైన యానిమేటెడ్ టీజర్లో నానిని విభిన్నమైన గ్యాంగ్స్టర్ పాత్రలో చూపించడం ఆ ఆసక్తిని మరింత పెంచింది. ప్రస్తుతం చిత్ర ప్రీ ప్రొడక్షన్ పనులు జరుగుతున్నాయని సినీ వర్గాల్లో ప్రచారం సాగుతోంది. ‘ది ప్యారడైజ్’ సినిమా కోసం కాస్త ఎక్కువ సమయం తీసుకున్న నాని తదుపరి సినిమాల విషయంలో జెట్ స్పీడ్ మెయింటెన్ చేయాలని భావిస్తున్నాడట.
Also Read : ప్రపంచ దేశాలకు జైశంకర్ వార్నింగ్.. అమెరికా తీరుపై భారత్ తీవ్ర అసంతృప్తి..!
అందుకే సుజీత్కు ముందుగానే సినిమాను ఆరు నెలల లోపు పూర్తి చేయాలని చెప్పాడట. అందుకు తగ్గట్లుగా సుజీత్ ప్రీ ప్రొడక్షన్ వర్క్ ప్లాన్ చేస్తున్నట్లు సమాచారం అందుతోంది. వచ్చే ఏడాది వేసవిలో విడుదల చేయాలనే లక్ష్యం ఉన్నప్పటికీ, షూటింగ్ షెడ్యూల్, విడుదల తేదీపై అధికారిక ప్రకటన రావాల్సి ఉంది. ఈ చిత్రంలో నాని సరసన మీనాక్షి చౌదరి నటించే అవకాశముందనే వార్త ఇప్పుడు చర్చనీయాంశంగా మారింది. పలువురి పేర్లను పరిశీలించిన తర్వాత చిత్రబృందం ఆమె వైపు మొగ్గుచూపినట్లు ప్రచారం జరుగుతోంది.
అయితే ఆమె ఎంపికను నిర్మాతలు ఇంకా ధ్రువీకరించలేదు. అధికారిక ప్రకటన వస్తే నాని, మీనాక్షి జోడీని తొలిసారి తెరపై చూడొచ్చు. ‘అనగనగా ఒక రాజు’ తర్వాత మీనాక్షి తదుపరి చిత్రాలపై అభిమానుల్లో ఆసక్తి ఉంది. నాగచైతన్యతో ఆమె నటిస్తున్న ‘వృషకర్మ’తో పాటు ‘బ్లడీ రోమియో’ కూడా ఆమె ఖాతాలో చేరితే, వచ్చే ఏడాది ఆమెకు కీలకంగా మారవచ్చు. ముఖ్యంగా సుజీత్ సినిమాలో ఆమె పాత్రకు ఎంత ప్రాధాన్యం ఉంటుందనేది ఆసక్తికరమైన అంశం.
Also Read : బ్యాంక్ ఖాతాదారులకు అలర్ట్.. ఎఫ్డీ రూల్స్ మారుతున్నాయా..?
సుజీత్ తన హీరోలను స్టైలిష్గా చూపించే తీరు కారణంగా, ఈసారి నానికి ఎలాంటి రూపాన్ని సిద్ధం చేశారనే ఉత్కంఠ ఉంది. మలయాళ నటుడు పృథ్వీరాజ్ సుకుమారన్ కూడా కీలక పాత్రలో కనిపించే అవకాశముందని గతంలో వార్తలు వచ్చాయి. నటీనటులు, షూటింగ్, విడుదల ప్రణాళికపై చిత్రబృందం నుంచి స్పష్టత వస్తే ‘బ్లడీ రోమియో’పై నెలకొన్న అంచనాలకు మరింత దిశ లభిస్తుంది.