కల్వకుంట్ల కవిత ఇటీవలే ప్రతిపాదించిన నూతన రాజకీయ పార్టీ తెలంగాణ రక్షణ సేన పేరుపై కేంద్ర ఎన్నికల సంఘం తీవ్ర అభ్యంతరాలు వ్యక్తం చేస్తూ గట్టి షాక్ ఇచ్చింది. కవిత తన కొత్త పార్టీ రిజిస్ట్రేషన్ కోసం దరఖాస్తు చేసుకోగా, ఆ పేరుతో ముందుకు సాగడం కుదరదని ఈసీ స్పష్టం చేస్తూ అధికారికంగా లేఖ పంపింది. రాబోయే 15 రోజుల్లోగా మూడు ప్రత్యామ్నాయ పేర్లను సమర్పించకపోతే, కొత్త పార్టీ రిజిస్ట్రేషన్ దరఖాస్తును పూర్తిగా క్లోజ్ చేస్తామని ఈసీ గడువు విధించింది. ఈ తాజా అల్టిమేటంతో కవిత తన పొలిటికల్ రోడ్ మ్యాప్ ను మార్చుకుని, కొత్త పేర్లను వెతుక్కోవాల్సిన పరిస్థితి ఏర్పడింది.
Also Read : లోకేష్ మార్క్ మ్యాజిక్.. కార్పొరేట్ను తలదన్నుతున్న ప్రభుత్వ స్కూల్స్!
గతంలో కేసీఆర్ నేతృత్వంలోని తెలంగాణ రాష్ట్ర సమితి, ఆ తర్వాత భారత్ రాష్ట్ర సమితిగా మారిన సంగతి తెలిసిందే. అయితే, కవిత మళ్లీ అదే టీఆర్ఎస్ అనే సంక్షిప్త నామం వచ్చేలా తెలంగాణ రక్షణ సేన అని పేరు పెట్టడం పాత సెంటిమెంట్ ను తప్పుదోవ పట్టిస్తుందని ఈసీ పేర్కొంది. ఈ పేరుపై ప్రజల నుంచి దాదాపు 700 వరకు భారీగా అభ్యంతరాలు రావడంతో, ఓటర్లలో గందరగోళం కలిగించే అవకాశం ఉన్నందున ఈ పేరును మార్చాల్సిందేనని ఈసీ తేల్చి చెప్పింది.
Also Read : అన్నం తిన్న తర్వాత విపరీతమైన బద్ధకం, నీరసం వస్తున్నాయా..?
ఈ తాజా పరిణామాలతో కవిత తన కొత్త పార్టీకి ఎలాంటి ప్రత్యామ్నాయ పేర్లను సిద్ధం చేస్తారనేది ఇప్పుడు తెలంగాణ రాజకీయాల్లో ఆసక్తికరంగా మారింది. కేసీఆర్ నాయకత్వంలోని భారత్ రాష్ట్ర సమితి పార్టీ కూడా ఈ పేరుపై ఈసీకి అధికారికంగా ఫిర్యాదు చేసింది. తెలంగాణ ఉద్యమ చరిత్రతో, పాత గులాబీ పార్టీతో విడదీయరాని బంధం ఉన్న టీఆర్ఎస్ అనే అక్షరాలను కవిత వాడుకోవడం వల్ల ఓటర్లు తీవ్రంగా గందరగోళానికి గురయ్యే అవకాశం ఉందని బీఆర్ఎస్ వాదించింది. కేవలం బీఆర్ఎస్ మాత్రమే కాకుండా, టీఆర్ఎస్ అనే అక్షరాలతో కూడిన పేర్ల కోసం మరో రెండు రాజకీయ పార్టీలు కూడా ఇప్పటికే దరఖాస్తు చేసుకున్నట్లు ఈసీ వెల్లడించింది.