ఆంధ్రప్రదేశ్ వైద్య ఆరోగ్య శాఖ జాతీయ స్థాయిలో సరికొత్త రికార్డు సృష్టించింది. ప్రభుత్వ ఆసుపత్రుల్లో రోగులకు సురక్షితమైన, నాణ్యమైన వైద్య సేవలు అందించడంలో మరియు నాణ్యత ప్రమాణాలను పాటించడంలో ఆంధ్రప్రదేశ్ దేశంలోనే ప్రథమ స్థానంలో నిలిచింది. ప్రపంచ రోగి భద్రతా దినోత్సవం సందర్భంగా న్యూఢిల్లీలో కేంద్ర వైద్య ఆరోగ్య శాఖ మరియు జాతీయ ఆరోగ్య మిషన్ ఆధ్వర్యంలో ఒక ప్రత్యేక కార్యక్రమం జరిగింది. ఈ కార్యక్రమంలో కేంద్ర ప్రభుత్వం దేశవ్యాప్తంగా నిర్వహించిన ఫలితాలను వెల్లడించింది.
Also Read: ఆటో మార్కెట్లో మారుతి సుజుకి భారీ ప్లాన్..!
జాతీయ స్థాయిలో ఆసుపత్రుల నాణ్యత ప్రమాణాల పరిశీలనలో ఏపీ రికార్డు స్థాయిలో 86 స్కోరు సాధించి అగ్రస్థానాన్ని కైవసం చేసుకుంది. ఈ జాబితాలో ఆంధ్రప్రదేశ్ తర్వాత మధ్యప్రదేశ్ (84.5), గుజరాత్ (83.5), డామన్-డయ్యూ (83), తమిళనాడు (82) టాప్-5 స్థానాల్లో నిలిచాయి. రాష్ట్రానికి దక్కిన ఈ ప్రతిష్టాత్మక గుర్తింపు పట్ల రాష్ట్ర వైద్య ఆరోగ్య శాఖ మంత్రి సత్యకుమార్ యాదవ్ తీవ్ర సంతోషం వ్యక్తం చేశారు. రాష్ట్ర నాణ్యతా విభాగం, జిల్లా నాణ్యతా బృందాలు, వైద్యులు, నర్సులు, ఇతర ఆరోగ్య సిబ్బంది నిరంతరం సమన్వయంతో, అంకితభావంతో పనిచేయడం వల్లే ఈ అద్భుత పురోగతి సాధ్యమైందని ఆయన కొనియాడారు.
Also Read: మరో వైసీపీ కీలక నేతకు షాక్..!
రోగి భద్రత అనేది కేవలం ఒక రోజు కార్యక్రమం కాదని, ఇది ప్రభుత్వ వైద్య సంస్థల్లో ఒక నిరంతర ప్రక్రియగా సాగాలని మంత్రి ఆకాంక్షించారు. ప్రభుత్వ ఆసుపత్రుల్లో నాణ్యతా ప్రమాణాలను మరింత పెంచి, పేద ప్రజలకు మరింత మెరుగైన, నమ్మకమైన వైద్య సేవలను అందించడానికి ఇదే స్ఫూర్తిని భవిష్యత్తులోనూ కొనసాగించాలని ఆయన అధికారులను, వైద్య సిబ్బందిని కోరారు. ఆసుపత్రుల్లో మౌలిక వసతుల పెంపు, వైద్య సేవల డిజిటలైజేషన్ మరియు కఠినమైన భద్రతా నిబంధనలను అమలు చేయడం ద్వారానే కూటమి ప్రభుత్వం ఈ ఘనత సాధించిందని వైద్య వర్గాలు హర్షం వ్యక్తం చేస్తున్నాయి.