వైకాపా అధ్యక్షుడు, మాజీ సీఎం వైఎస్ జగన్ మోహన్ రెడ్డికి సొంత మేనత్త ఊరి ప్రజలు బిగ్‌షాక్ ఇచ్చారు. NTR జిల్లా మైలవరం నియోజకవర్గ పరిధిలోని గణపవరం గ్రామం జగన్ సొంత మేనత్త విమలమ్మ స్వగ్రామం. వైఎస్ కుటుంబానికి ఎంతో ప్రత్యేకమైన ఈ ఊరిలో తాజాగా జరిగిన స్థానిక సంస్థల ఎన్నికల్లో వైసీపీకి గట్టి ఎదురుదెబ్బ తగిలింది. మేనత్త ఊరిలోనే వైసీపీ ఘోర పరాజయం పాలవ్వడం ఇప్పుడు రాజకీయ వర్గాల్లో హాట్ టాపిక్‌గా మారింది.
Also Read : న్యోమాలో అద్భుత ల్యాండింగ్.. చరిత్ర సృష్టించిన వాయుసేన!
గణపవరం ఎంపీటీసీ స్థానంలో టీడీపీ అభ్యర్థి తాళ్ల రామకృష్ణ అద్భుత విజయాన్ని సాధించారు. ఆయన తన సమీప వైసీపీ అభ్యర్థి సందిపాము రమేశ్‌పై 285 ఓట్ల స్పష్టమైన మెజారిటీతో గెలుపొందారు. ఈ స్థానంలో గెలుపు కోసం వైసీపీ శ్రేణులు సర్వశక్తులూ ఒడ్డినప్పటికీ, స్థానిక ప్రజలు మాత్రం కూటమి అభ్యర్థికే పట్టంగట్టారు. దీంతో విమలమ్మ సొంత ఊరిలోనే జగన్ పార్టీకి ఓటమి తప్పలేదు.
గడచిన రెండు దశాబ్దాలుగా గణపవరం గ్రామంలో ఒకే పార్టీ ఆధిపత్యం నడుస్తూ వచ్చింది. గత 20 ఏళ్లుగా ఈ గ్రామంలో మొదట కాంగ్రెస్, ఆ తర్వాత వైసీపీ తరఫున పోటీ చేసిన అభ్యర్థులే ఎంపీటీసీలుగా గెలుపొందుతూ వచ్చారు. ఇన్నాళ్లుగా తమ కోటలా భావించిన గ్రామంలో ఇప్పుడు ఊహించని విధంగా ఓటమి ఎదురవ్వడాన్ని వైసీపీ నాయకులు, కేడర్ జీర్ణించుకోలేకపోతున్నారు.
Also Read : ప్రాదేశిక పోరులో కూటమి దూకుడు.. కానీ..!
సరిగ్గా రెండు దశాబ్దాల తర్వాత గణపవరంలో టీడీపీ జెండా ఎగరడంతో కూటమి నాయకులు, కార్యకర్తలు తీవ్ర ఉత్సాహంలో మునిగిపోయారు. ఫలితం వెలువడగానే ఊరంతా బాణసంచా కాల్చి, మిఠాయిలు పంచుకుంటూ పెద్ద ఎత్తున సంబరాలు చేసుకున్నారు. జగన్ సొంత మేనత్త ఊరిలోనే ప్రజలు మార్పును కోరుకున్నారని, ఈ విజయం కూటమి ప్రభుత్వ పాలనకు ప్రజలు ఇచ్చిన తిరుగులేని తీర్పని స్థానిక నేతలు హర్షం వ్యక్తం చేస్తున్నారు.
