రాజంపేట వైఎస్సార్‌సీపీ ఎంపీ పెద్దిరెడ్డి మిథున్ రెడ్డికి ఆంధ్రప్రదేశ్ హైకోర్టులో గట్టి ఎదురుదెబ్బ తగిలింది. పుంగనూరు మున్సిపల్ ఎన్నికల నామినేషన్ల ప్రక్రియ సందర్భంగా చోటుచేసుకున్న ఘర్షణలు, దాడుల ఉదంతంలో నమోదైన 4 కేసుల్లో ఆయనకు ఎలాంటి న్యాయపరమైన ఊరట లభించలేదు. తనపై నమోదైన కేసులను కొట్టివేయాలని, అలాగే విచారణ ముగిసేవరకు పోలీసులు అరెస్టు చేయకుండా రక్షణ కల్పిస్తూ మధ్యంతర ఉత్తర్వులు ఇవ్వాలని మిథున్ రెడ్డి హైకోర్టును ఆశ్రయించారు. అయితే, ఈ పిటిషన్లపై విచారణ జరిపిన న్యాయస్థానం, ఆయనకు అరెస్టు నుంచి ఎలాంటి మినహాయింపు లేదా రక్షణ ఇచ్చేందుకు స్పష్టంగా నిరాకరించింది.
Also Read : ఏపీ ఎన్నికల సంఘం సంచలన నిర్ణయం..!
పుంగనూరు పోలీసు స్టేషన్‌లో మిథున్ రెడ్డిపై హత్యాయత్నం సహా పలు తీవ్రమైన సెక్షన్ల కింద నాలుగు ఎఫ్‌ఐఆర్‌లు నమోదయ్యాయి. కోర్టులో విచారణ సందర్భంగా మిథున్ రెడ్డి తరఫు న్యాయవాది వాదిస్తూ.. ఒకే ఘటనపై వేర్వేరుగా నాలుగు కేసులు నమోదు చేయడం చెల్లదని, రాజకీయ కక్షసాధింపులో భాగంగానే ఈ కేసులు పెట్టారని పేర్కొన్నారు. దీనిపై ప్రభుత్వ తరఫు న్యాయవాది తీవ్ర అభ్యంతరం వ్యక్తం చేశారు. నామినేషన్ కేంద్రాల వద్ద ఉద్దేశపూర్వకంగానే భారీ కాన్వాయ్, అనుచరులతో వచ్చి ఘర్షణలకు దిగారని, వేర్వేరు చోట్ల జరిగిన ఈ దాడుల్లో దాదాపు 30 మందికి పైగా గాయపడ్డారని కోర్టు దృష్టికి తీసుకెళ్లారు.
Also Read : మన శరీరంలో రెండో గుండె ఎక్కడుందో తెలుసా..?
ఇరుపక్షాల వాదనలు విన్న హైకోర్టు, తదుపరి పూర్తిస్థాయి విచారణను డిసెంబర్ 28 కి వాయిదా వేసింది. కోర్టు నుంచి రక్షణ లభించకపోవడంతో ఇప్పుడు మిథున్ రెడ్డి అరెస్ట్‌కు పోలీసులు రంగం సిద్ధం చేస్తున్నట్లు రాజకీయ వర్గాల్లో జోరుగా ప్రచారం సాగుతోంది. ఈ కేసుల్లో ఆయనను ప్రధాన నిందితుడిగా పేర్కొన్న నేపథ్యంలో, విచారణ నిమిత్తం పోలీసులు ఎప్పుడైనా ఆయన్ను అదుపులోకి తీసుకునే అవకాశం ఉందనే చర్చ నడుస్తోంది. చట్టపరమైన రక్షణ కవచం లేకపోవడంతో మిథున్ రెడ్డి చుట్టూ పోలీసు పంజరం గట్టిగా బిగుసుకుంటోందని, పుంగనూరు పోలీసు యంత్రాంగం ఇప్పటికే ఈ దిశగా తదుపరి చర్యలకు సిద్ధమవుతోందని సమాచారం. హైకోర్టు ఇచ్చిన ఈ షాక్‌తో వైకాపా శ్రేణుల్లో తీవ్ర ఆందోళన వ్యక్తమవుతోంది.
