దుబాయ్ నుండి ఇజ్రాయెల్‌లోని టెల్ అవీవ్‌కు వెళ్తున్న ఫ్లైదుబాయ్ విమానంలో చోటుచేసుకున్న ఘటన కలకలం రేపుతోంది. భారత కెప్టెన్ స్మిత్ మఛ్ఛార్‌పై కత్తితో దాడి చేయడానికి ఒమన్ జాతీయుడైన కో-పైలట్ చేసిన ప్రయత్నం వెనుక ఇరాన్ హస్తం ఉండవచ్చని అమెరికా అధ్యక్షుడు డోనాల్డ్ ట్రంప్ సంచలన కామెంట్స్ చేసారు. ఈ ఘటనపై ఇరాన్ లింకుల గురించి మీడియా ప్రతినిధులు ప్రశ్నించగా, తమ నిఘా సంస్థలు ప్రస్తుతం దీనిపైనే విచారణ జరుపుతున్నాయని, ఇప్పటివరకు అందిన ప్రాథమిక సమాచారం ప్రకారం ఇరాన్ ప్రమేయం ఉండే అవకాశం “అవును” అనేలానే ఉందని ట్రంప్ వ్యాఖ్యానించారు.
Also Read : వైసీపీ నేతలను వేటాడుతున్న ఈడీ..!
ఒకవేళ ఈ దాడి వెనుక ఇరాన్ హస్తం ఉన్నట్లు ఆధారాలతో రుజువైతే, ఇరాన్‌పై అమెరికా అత్యంత కఠినంగా విరుచుకుపడుతుందని, ఇందులో ఎలాంటి సందేహం లేదని ఆయన తీవ్రస్థాయిలో హెచ్చరించారు. ఈ దాడికి ఒడిగట్టిన కో-పైలట్‌ను ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ ముందే ప్లాన్ ప్రకారం విమానంలోకి చొప్పించిందా లేదా అతను ఆ తర్వాత ఇస్లామిక్ తీవ్రవాద భావజాలానికి గురై ఈ పని చేశాడా అనే కోణంలో దర్యాప్తు జరుగుతోందని ట్రంప్ వివరించారు. ఇదే సమయంలో, కో-పైలట్ జరిపిన అనాగరిక కత్తి దాడిని ప్రాణాలకు తెగించి అడ్డుకున్న భారత కెప్టెన్ స్మిత్ మఛ్ఛార్‌ను ట్రంప్ ఒక హీరోగా కొనియాడారు.
Also Read : వైసీపీ పెద్ద తలకాయలపై గురిపెట్టిన ఈడీ..!
గాయపడినప్పటికీ కెప్టెన్ కాక్‌పిట్ తలుపులు తెరిచి, విమానంలోని ఇద్దరు రిజర్వ్ పైలట్లు, ప్రయాణికుల సహాయంతో కో-పైలట్‌ను లొంగదీసుకోవడం వల్లే వందలాది మంది ప్రయాణికుల ప్రాణాలు దక్కాయని, విమానం భారీ విపత్తు నుండి తప్పించుకుందని కొనియాడారు. మరోవైపు, ఈ వ్యవహారంపై ఇజ్రాయెల్ ప్రధాన మంత్రి బెంజిమన్ నెతన్యాహు కాస్త ఆచితూచి స్పందించారు. కో-పైలట్‌కు ఇరాన్‌తో కానీ, మరే ఇతర సంస్థలతో కానీ సంబంధాలు ఉన్నాయని ఇప్పుడే ఖచ్చితంగా చెప్పలేమని ఆయన పేర్కొన్నారు. అయితే, సదరు కో-పైలట్ తీవ్రమైన ఇస్లామిక్ సంప్రదాయవాద భావజాలంతో ప్రభావితుడయ్యాడని అతని వ్యక్తిగత సమాచారాన్ని బట్టి స్పష్టమవుతోందని నెతన్యాహు వెల్లడించారు.