ఆంధ్రప్రదేశ్‌లో రానున్న స్థానిక సంస్థల ఎన్నికలను తెలుగుదేశం పార్టీ అత్యంత ప్రతిష్టాత్మకంగా తీసుకుంది. ఇటీవలే పార్టీ వర్కింగ్ అధ్యక్షుడిగా బాధ్యతలు చేపట్టిన నారా లోకేష్ ఈ ఎన్నికలను అత్యంత సీరియస్‌గా తీసుకున్నారు. పార్టీలో కీలక పరిణామాల మధ్య జరుగుతున్న ఈ ఎన్నికల్లో విజయం సాధించడం ద్వారా పట్టు నిలుపుకోవాలని లోకేష్ గట్టి పట్టుదలతో ఉన్నారు. ఈ నేపథ్యంలో పార్టీ శ్రేణులను, నేతలను సమాయత్తం చేసే పనిలో నిమగ్నమయ్యారు. అయితే, ఈ ఎన్నికల్లో అభ్యర్థుల ఎంపిక విషయంలో నారా లోకేష్ తీసుకున్న ఒక అనూహ్యమైన నిర్ణయం ఇప్పుడు రాష్ట్ర రాజకీయాల్లో, ముఖ్యంగా టీడీపీ పార్టీ వర్గాల్లో తీవ్ర చర్చనీయాంశంగా మారింది. స్థానిక సంస్థల ఎన్నికల టికెట్ల కేటాయింపునకు సంబంధించి ఎమ్మెల్యేల పాత్రను పూర్తిగా పక్కన పెట్టారు. నేరుగా కేంద్ర పార్టీ కార్యాలయం ద్వారానే కసరత్తు చేస్తుండటం హాట్ టాపిక్‌గా మారింది.
Also Read : డిసెంబర్‌కు వాయిదా పడనున్న స్థానిక సంస్థల ఎన్నికలు..?
సాధారణంగా స్థానిక సంస్థల ఎన్నికలు అనగానే ఆయా నియోజకవర్గాల ఎమ్మెల్యేల కనుసన్నల్లోనే అభ్యర్థుల ఎంపిక ప్రక్రియ అంతా సాగుతుంటుంది. కానీ, నారా లోకేష్ ఈ సంప్రదాయానికి పూర్తిగా స్వస్తి పలికారు. అభ్యర్థుల ఎంపికలో ఎమ్మెల్యేలకు అవకాశం ఇవ్వకుండా, నేరుగా పార్టీ కేంద్ర కార్యాలయమే ఆ బాధ్యతలను తన చేతుల్లోకి తీసుకోవడం ఇదే తొలిసారి. ఎమ్మెల్యేలు తమకు వ్యక్తిగతంగా అనుకూలమైన వారిని లేదా తమ బంధువర్గానికి చెందిన వారినే ఎంపిక చేస్తారన్న అనుమానం లోకేష్‌కు వచ్చినట్లు తెలుస్తోంది. అలా జరిగితే పార్టీ కోసం అంకితభావంతో కష్టపడుతూ, జెండా మోసిన నిజమైన కార్యకర్తలకు తీవ్ర అన్యాయం జరుగుతుందని భావించి లోకేష్ ఈ పటిష్టమైన నిర్ణయం తీసుకున్నారంటున్నారు. ఎక్కడా పక్షపాత ధోరణికి తావు లేకుండా పారదర్శకమైన విధానాన్ని అవలంబించాలని లోకేష్ ఇప్పటికే స్పష్టం చేశారు.
పార్టీ కేంద్ర కార్యాలయం వేదికగా అత్యంత పారదర్శకంగా అభ్యర్థుల ఎంపిక ప్రక్రియ జరగాలని లోకేష్ స్పష్టమైన ఆదేశాలు జారీ చేశారు. ప్రతి నియోజకవర్గం నుంచి మేయర్, చైర్మన్ అలాగే కార్పొరేటర్ స్థానాలకు సంబంధించి ముగ్గురు సమర్థులైన అర్హుల పేర్లను ప్రాధాన్యత క్రమంలో పార్టీ కేంద్ర కార్యాలయానికి పంపాలని ఆదేశించారు. అభ్యర్థుల ఎంపికలో కేవలం సిఫార్సులకు కాకుండా, వారి రాజకీయ నేపథ్యం, పార్టీ కోసం వారు గతంలో చేసిన సేవలు, క్షేత్రస్థాయిలో ఉన్న ప్రజాబలం, నిజాయితీకి మాత్రమే పెద్దపీట వేయాలని స్పష్టం చేశారు. ఈ ప్రక్రియను కేవలం వ్యక్తిగత సిఫార్సులు లేదా సిట్టింగ్ ఎమ్మెల్యేల ఒత్తిళ్లకు పరిమితం చేయకుండా అధికారికంగా చేపడుతుండటంతో పార్టీలో నూతన జోష్ కనిపిస్తున్నప్పటికీ, కొందరు నేతల్లో మాత్రం ఆందోళన వ్యక్తమవుతోంది.
కేంద్ర పార్టీయే నేరుగా అభ్యర్థులను ఎంపిక చేస్తుండటంతో, తమ నియోజకవర్గాల్లో తమ మాట చెల్లదనే భావనలో ఎమ్మెల్యేలు ఉన్నట్లు తెలుస్తోంది. తాము సూచించిన వారైతే భవిష్యత్తులో తమకు రాజకీయంగా తోడ్పాటు అందిస్తారని, అదే కేంద్ర నాయకత్వం ఎంపిక చేసిన వారైతే భవిష్యత్తులో తమను ఎదిరించే అవకాశాలు ఉంటాయని కొందరు ఎమ్మెల్యేలు ఆందోళన చెందుతున్నట్లు సమాచారం. అభ్యర్థుల ఎంపిక బాధ్యత అంతా కేంద్ర కార్యాలయం చూసుకుంటే, కేవలం ప్రచారానికి మాత్రమే తమను పరిమితం చేస్తారేమోనన్న గుసగుసలు వినిపిస్తున్నాయి. దీనివల్ల తాము కేవలం డమ్మీలుగా మారిపోయామన్న భావనలో కొందరు ఎమ్మెల్యేలు ఉన్నట్లు రాజకీయ వర్గాల్లో ప్రచారం జరుగుతోంది.
Also Read : రచ్చ చేస్తున్న ఫామ్‌హౌస్ పాలిటిక్స్..!
అభ్యర్థుల ఎంపిక ఎలా ఉన్నప్పటికీ, స్థానిక ఎన్నికల్లో పార్టీ విజయం సాధించి తీరాల్సిందేనని లోకేష్ స్పష్టం చేశారు. ఎంపిక చేసిన అభ్యర్థులు ఎవరైనా సరే, వారిని సమన్వయం చేసుకుంటూ భారీ విజయాలను గెలుచుకుని రావాల్సిన పూర్తి బాధ్యత మాత్రం ఆయా నియోజకవర్గాల ఎమ్మెల్యేల పైనే ఉంటుందని లోకేష్ తేల్చి చెప్పారు. అక్టోబర్‌లోనే స్థానిక సంస్థల ఎన్నికలు ఖచ్చితంగా జరిగే అవకాశం ఉందని, ఎన్నికలు వాయిదా పడతాయంటూ వస్తున్న తప్పుడు ప్రచారాలను నమ్మకుండా నాయకులు, శ్రేణులు పూర్తిస్థాయి సంసిద్ధతతో సిద్ధంగా ఉండాలని ఆయన దిశానిర్దేశం చేశారు. ఈ వ్యూహం కూటమి అభ్యర్థుల విజయానికి ఎంతవరకు దోహదపడుతుంది.. ఎమ్మెల్యేల అసంతృప్తిని పార్టీ ఎలా అధిగమిస్తుంది అనేది రానున్న కాలంలో తేలనుంది.