తెలంగాణ రాజకీయాలు ప్రస్తుతం ఫామ్ హౌస్ చుట్టూ తిరుగుతున్నాయి. రెండున్నరేళ్లుగా అధికార, ప్రతిపక్షాల మధ్య మాటల మంటలు పుట్టిస్తున్నాయి. ఈ క్రమంలో బీఆర్ఎస్ అధినేత, మాజీ ముఖ్యమంత్రి కేసీఆర్ ఎర్రవల్లి ఫామ్ హౌస్ భూముల వ్యవహారంలో అత్యంత కీలకమైన పరిణామం చోటుచేసుకుంది. రాష్ట్రవ్యాప్తంగా సర్వత్రా ఉత్కంఠ రేకెత్తిస్తున్న ఈ ఫామ్ హౌస్ భూముల సర్వే ప్రక్రియ ఎట్టకేలకు పూర్తికావడంతో పాటు, దీనికి సంబంధించిన సమగ్రమైన నివేదిక కూడా పూర్తిగా సిద్ధమైనట్లు విశ్వసనీయ వర్గాల సమాచారం.
Also Read : గంభీర్ కు గంగూలీ బిగ్ అలెర్ట్.. వరల్డ్ కప్ కోసమే..!
కొంతకాలంగా అధికార కాంగ్రెస్ పార్టీకి, ప్రతిపక్ష బీఆర్ఎస్ శ్రేణులకు మధ్య మాటల యుద్ధానికి, తీవ్ర వాగ్వాదాలకు కారణమైన ఈ ప్రతిష్టాత్మక అంశంపై ఇప్పుడు రెవెన్యూ యంత్రాంగం నివేదిక సిద్ధం చేయడంతో రాజకీయ వర్గాల్లో తీవ్ర ఆసక్తి నెలకొంది. ఈ నివేదిక ఆధారంగా రాష్ట్ర ప్రభుత్వం ఎలాంటి కఠిన చర్యలు తీసుకోబోతుందనే దానిపై సర్వత్రా ఉత్కంఠ కొనసాగుతుంది. గ్రామీణ స్థాయిలో, రాష్ట్ర రాజకీయ వర్గాల్లో కూడా తీవ్ర సంచలనం సృష్టించిన కేసీఆర్ ఎర్రవల్లి ఫామ్ హౌస్ భూముల కొనుగోళ్లు, సరిహద్దుల నిర్ధారణ.. అలాగే ప్రభుత్వ భూముల ఆక్రమణల ఆరోపణలపై రెవెన్యూ, సర్వే శాఖ అధికారులు క్షేత్రస్థాయిలో తీవ్రంగా కసరత్తు చేశారు.
గతంలో వివిధ వర్గాల నుంచి వచ్చిన ఫిర్యాదులు, ప్రభుత్వ ఉన్నతాధికారుల నుంచి వచ్చిన ఆదేశాల మేరకు రంగంలోకి దిగిన అధికారులు.. అన్ని కోణాల్లో సర్వే నిర్వహించారు. అయితే, ఈ సర్వే ప్రక్రియ జరుగుతున్న సమయంలో అధికారులు నేరుగా ఫామ్‌హౌస్ లోపలికి వెళ్లలేదని, బయటి సరిహద్దులు, పాత రెవెన్యూ రికార్డులు, శాటిలైట్ మ్యాప్‌ల ఆధారంగా కొలతలు పూర్తి చేశారనే చర్చ కూడా రాజకీయ వర్గాల్లో బలంగా జరుగుతోంది. ఏది ఏమైనప్పటికీ, వివాదాస్పదంగా మారిన ఈ భూముల సర్వేకు సంబంధించిన పూర్తి స్థాయి నివేదికను అధికారులు ఇప్పటికే సిద్ధం చేసి ఉన్నతాధికారులకు అందజేసేందుకు సర్వం సిద్ధం చేసినట్లు తెలుస్తోంది.
ఫామ్ హౌస్ సర్వే నివేదిక తుదిరూపు సంతరించుకోవడంతో ఇప్పుడు అందరి దృష్టి రాష్ట్ర ప్రభుత్వం, ముఖ్యమంత్రి రేవంత్ రెడ్డి వైపే నిలిచింది. కాంగ్రెస్ ప్రభుత్వం అధికారంలోకి వచ్చిన నాటి నుంచి కేసీఆర్ ఫామ్ హౌస్ భూముల అంశాన్ని అత్యంత ప్రతిష్టాత్మకంగా, సీరియస్‌గా తీసుకున్నట్లు రాజకీయ విశ్లేషకులు భావిస్తున్నారు. ఈ సర్వే నివేదికలో అసలు ఎటువంటి నిజాలు వెలుగుచూశాయి? నిబంధనలకు విరుద్ధంగా ఏమైనా ప్రభుత్వ భూములు లేదా అసైన్డ్ భూములు ఫామ్ హౌస్ పరిధిలోకి వచ్చాయా? లేదా రికార్డులు అనీ చట్టబద్ధంగా, సక్రమంగానే ఉన్నాయా అనే విషయాలు త్వరలోనే అధికారికంగా బయటకు వచ్చే అవకాశం ఉంది. ఒకవేళ నివేదికలో ఏవైనా అక్రమాలు లేదా నిబంధనల ఉల్లంఘనలు బయటపడితే, రాష్ట్ర ప్రభుత్వం ఏ విధమైన చర్యలు తీసుకుంటుందనేది ప్రస్తుతం రాజకీయంగా తీవ్ర చర్చనీయాంశంగా మారింది.
Also Read : డిసెంబర్‌కు వాయిదా పడనున్న స్థానిక సంస్థల ఎన్నికలు..?
మాజీ ముఖ్యమంత్రి కేసీఆర్‌కు సంబంధించిన ఏ చిన్న అంశమైనా సరే రాష్ట్ర రాజకీయాలను ఒక్కసారిగా ఉర్రూతలూగిస్తుండగా, తాజా ఫామ్ హౌస్ సర్వే రిపోర్ట్ అంశం రాబోయే రోజుల్లో భారీ రాజకీయ దుమారానికి, తీవ్ర ఘర్షణకు దారితీసే సూచనలు స్పష్టంగా కనిపిస్తున్నాయి. బీఆర్ఎస్ అధినేతను రాజకీయంగా ఇరుకున పెట్టేందుకే ప్రభుత్వం ఈ సర్వే పేరుతో అనవసర ఒత్తిడి తెస్తోందని గులాబీ శ్రేణులు ఆరోపిస్తున్నాయి. అయితే చట్టం ముందు అందరూ సమానులేనని, తప్పు చేసి ఉంటే ఎవరైనా సరే శిక్షార్హులేనని కాంగ్రెస్ నాయకులు ధీటుగా జవాబిస్తున్నారు. ఈ నేపథ్యంలో సిద్ధమైన సర్వే నివేదికను ప్రభుత్వం ఏ విధంగా బయట పెడుతుంది, దీనిపై బీఆర్ఎస్ ఏ విధంగా స్పందిస్తుంది అనే అంశాలు రాష్ట్ర రాజకీయాల్లో ముందస్తు ప్రకంపనలు సృష్టిస్తున్నాయి. నివేదిక బహిరంగమైన తర్వాత అధికార, ప్రతిపక్షాల మధ్య రాజకీయ పోరు మరింత తీవ్రతరం కావడం ఖాయంగా కనిపిస్తోంది.