కొందరు పార్టీ నిర్ణయానికి కట్టుబడి అధికారిక అభ్యర్థుల తరపున ప్రచారానికి సిద్ధమవుతుండగా, మరికొందరు అసంతృప్తిని బహిరంగంగానే వ్యక్తం చేస్తున్నారు. ఇంకొందరు ప్రత్యక్షంగా వ్యతిరేకించకపోయినా ప్రచారంలో ఎంతమేరకు భాగస్వాములవుతారన్నది ప్రశ్నార్థకంగా మారింది. పైకి పార్టీ ఐక్యతను చాటుతూ లోపల అసంతృప్తిని కొనసాగించే పరిస్థితులు ఏర్పడితే అవి ఎన్నికల ఫలితాలపై ప్రభావం చూపే అవకాశముంది. ముఖ్యంగా స్వల్ప ఓట్ల తేడాతో ఫలితాలు తేలే వార్డుల్లో స్థానిక నాయకుల సహకారం, వారి అనుచరగణం పాత్ర నిర్ణయాత్మకంగా మారవచ్చు. రాష్ట్ర ఎన్నికల సంఘం నవంబర్ 1న పోలింగ్ నిర్వహించనున్నట్లు సవరించిన షెడ్యూల్ ప్రకటించడంతో రాజకీయ పార్టీలకు ప్రచార వ్యూహాలతోపాటు అంతర్గత విభేదాలను చక్కదిద్దుకోవాల్సిన అవసరం ఏర్పడింది.
వార్డుల్లో ఎన్నికల పోటీకి సమయం దగ్గర పడుతున్న కొద్దీ అభ్యర్థుల బలాబలాలతో పాటు సొంత పార్టీ నాయకుల మధ్య సంబంధాలు కూడా రాజకీయ చర్చకు కేంద్రంగా మారుతున్నాయి. ఎన్నికల్లో ఒక్కో వార్డు నుంచి ప్రధాన పార్టీల తరఫున పోటీ చేయాలని పలువురు నాయకులు ఆశించారు. కొన్నేళ్లుగా పార్టీ కార్యక్రమాల్లో పాల్గొన్నవారు, గతంలో కార్పొరేటర్లుగా పనిచేసినవారు, స్థానికంగా సేవా కార్యక్రమాలు నిర్వహించినవారు.. పార్టీ పదవుల్లో కొనసాగుతున్నవారు టికెట్ల కోసం ప్రయత్నించారు. అయితే చివరకు ఒక్కరికే అధికారిక అవకాశం దక్కడంతో మిగిలిన ఆశావాహుల్లో అసంతృప్తి వ్యక్తమైంది. ముఖ్యంగా చివరి దశ వరకు టికెట్ వస్తుందని ఆశించిన నాయకులకు పార్టీ నిర్ణయం రాజకీయంగా ఇబ్బందికర పరిస్థితిని సృష్టించింది.
Also Read : జగన్ పై చంద్రబాబు సంచలన కామెంట్స్..!
చాలా మందికి అవకాశం కల్పిస్తామని పార్టీ పెద్దలు హామీ ఇచ్చినా.. చివరకు బీ-ఫారం ఇవ్వకపోవడంతో.. వారంతా ఇప్పుడు అసంతృప్తితో రగిలిపోతున్నారు. టికెట్ దక్కని నాయకులను సమన్వయం చేసుకోవడంలో పార్టీలు విఫలమైతే దాని ప్రభావం ఎన్నికల ప్రచారంపై పడే అవకాశముంది. రాజకీయాల్లో పార్టీ నిర్ణయాన్ని బహిరంగంగా అంగీకరించడం ఒక అంశమైతే, ఆ నిర్ణయాన్ని మనస్ఫూర్తిగా అమలు చేయడం మరో అంశం. టికెట్ దక్కని ఆశావాహులందరూ ఒకే విధంగా స్పందించరు. కొందరు వ్యక్తిగత అసంతృప్తిని పక్కనపెట్టి పార్టీ అభ్యర్థి గెలుపునకు పనిచేస్తారు. మరికొందరు పరిమితంగా ప్రచారంలో పాల్గొంటారు. ఇంకొందరు తమ అనుచరులను పూర్తిస్థాయిలో సమీకరించకపోవచ్చు.పార్టీ సమావేశాల్లో పాల్గొనడం, అభ్యర్థితో కలిసి ఫొటోలు దిగడం, బహిరంగంగా మద్దతు ప్రకటించడం మాత్రమే ఐక్యతకు కొలమానం కాదు.
ఓటర్లను కలవడం, పోలింగ్ కేంద్రాల వారీగా కార్యకర్తలను సమన్వయం చేయడం, చివరి వరకు ప్రచార బాధ్యతలను నిర్వర్తించడం వంటి అంశాల్లోనే నిజమైన సహకారం వెల్లడవుతుంది. కొన్ని వార్డుల్లో టికెట్ దక్కని నాయకులు ప్రత్యర్థి అభ్యర్థికి పరోక్షంగా లాభం చేకూర్చేలా వ్యవహరించే అవకాశం ఉందన్న రాజకీయ అనుమానాలు వ్యక్తమవుతున్నాయి. అయితే కొందరు నాయకులు ఉద్దేశపూర్వకంగా తమ పార్టీ అభ్యర్థులను ఓడించేందుకు ప్రయత్నిస్తున్నారనే అనుమానాలు కూడా వ్యక్తం అవుతున్నాయి. బహిరంగ మద్దతు వెనుక నిజమైన సహకారం ఉందా లేదా అన్నది ప్రచారం చివరి దశలోనే స్పష్టమవుతుంది.
Also read : నిప్పుతో చెలగాటం వద్దు ట్రంప్..!
కూటమి సీట్ల పంపకాన్ని ఖరారు చేసింది. అయితే ఈ సర్దుబాటుకు ముందు మూడు పార్టీల్లోనూ పలువురు నాయకులు టికెట్ల కోసం ప్రయత్నించారు. చివరకు తమకు అవకాశం దక్కకపోవడంతో కొందరు నిరాశకు గురయ్యారు. సీట్ల పంపకం పూర్తయిందంటే రాజకీయ సమన్వయం కూడా పూర్తయినట్లు కాదు. టీడీపీ పోటీ చేసే వార్డుల్లో జనసేన, బీజేపీ శ్రేణులు ఎంత చురుగ్గా పనిచేస్తాయి..? జనసేన అభ్యర్థి బరిలో ఉన్న చోట టీడీపీ నాయకులు ఎంతమేరకు సహకరిస్తారు..? బీజేపీ అభ్యర్థులకు మిగిలిన రెండు పార్టీల స్థానిక నాయకత్వం నుంచి ఎంత మద్దతు లభిస్తుంది? అనే ప్రశ్నలు కీలకంగా మారనున్నాయి. కూటమి నాయకత్వం కూడా ఈ అంశంపై దృష్టిసారించింది.
