విశాఖపట్నంలో ప్రతిష్టాత్మకంగా జరుగుతున్న 31వ సీఐఐ భాగస్వామ్య సదస్సు వేదికగా ఆంధ్రప్రదేశ్ ఉప ముఖ్యమంత్రి పవన్ కళ్యాణ్‌తో రాష్ట్ర ఐటీ శాఖ మంత్రి నారా లోకేష్ మర్యాదపూర్వకంగా భేటీ అయ్యారు. సదస్సులో పాల్గొనేందుకు విచ్చేసిన పవన్ కళ్యాణ్‌ను కలిసిన లోకేష్, రాష్ట్ర సమగ్ర అభివృద్ధి, పారిశ్రామిక ప్రగతికి సంబంధించిన కీలక అంశాలను ఆయనతో పంచుకున్నారు. కూటమి ప్రభుత్వంలోని ఇద్దరు కీలక నేతల మధ్య జరిగిన ఈ స్నేహపూర్వక సమావేశం సదస్సు ప్రాంగణంలో ప్రత్యేక ఆకర్షణగా నిలిచింది.
Also Read : ఏపీకి భారీ పెట్టుబడుల వెల్లువ.. మరో ప్రముఖ కంపెనీ ఎంట్రీ..!
ఈ సందర్భంగా, ఆంధ్రప్రదేశ్‌లో పెద్ద ఎత్తున పెట్టుబడులు పెట్టేందుకు ముందుకు వస్తున్న ప్రముఖ దేశ, విదేశీ ఇన్వెస్టర్ల వివరాలను మంత్రి లోకేష్ డిప్యూటీ సీఎం పవన్ కళ్యాణ్‌కు సవివరంగా తెలియజేశారు. ముఖ్యంగా గ్రీన్ ఎనర్జీ, ఐటీ, ఎలక్ట్రానిక్స్, మౌలిక సదుపాయాల రంగాల్లో కుదుర్చుకుంటున్న ఒప్పందాల పురోగతిని ఆయన దృష్టికి తీసుకెళ్లారు. ఈ భారీ ప్రాజెక్టుల ఏర్పాటు ద్వారా రాష్ట్ర యువతకు లభించబోయే లక్షలాది ప్రత్యక్ష, పరోక్ష ఉపాధి అవకాశాలపై ఇరువురు నేతలు సుదీర్ఘంగా చర్చించారు.
Also Read : జెడ్పీటీసీ ఎన్నికల్లో వాళ్లే హీరోలు..!
రాష్ట్రానికి భారీ స్థాయిలో పెట్టుబడులను ఆకర్షించేందుకు నారా లోకేష్ చూపుతున్న ప్రత్యేక చొరవ, అంకితభావాన్ని డిప్యూటీ సీఎం పవన్ కళ్యాణ్ మనస్ఫూర్తిగా అభినందించారు. గతంలో ఎన్నడూ లేని విధంగా అంతర్జాతీయ దిగ్గజ సంస్థలు ఏపీ వైపు చూడటం శుభపరిణామమని, రాష్ట్ర పారిశ్రామిక ప్రగతి దిశగా ఇదే వేగం, ఒరవడి భవిష్యత్తులోనూ కొనసాగాలని ఆయన ఆకాంక్షించారు. కుదుర్చుకున్న ప్రతి ఒప్పందం త్వరితగతిన కార్యరూపం దాల్చేలా ప్రభుత్వం తరపున పూర్తి సహకారం అందిస్తూ, రాష్ట్ర ఆర్థిక వ్యవస్థను బలోపేతం చేసే దిశగా కలిసికట్టుగా ముందుకు సాగాలని ఇరువురు నేతలు అభిప్రాయపడ్డారు.
