రష్యా నుంచి ముడి చమురు మరియు సహజ వాయువును దిగుమతి చేసుకుంటున్న భారత్, చైనాలకు అమెరికా నుంచి ఒక పెద్ద ఊరట లభించింది. రష్యాపై మరిన్ని ఆంక్షలు విధించేందుకు అమెరికా కాంగ్రెస్ రూపొందించిన తాజా ద్వైపాక్షిక బిల్లులో కీలక మార్పులు చేశారు. మొదట ప్రతిపాదించిన భయంకరమైన 500 శాతం సుంకాల స్థానంలో, గరిష్ట పన్ను పరిమితిని 100 శాతానికి తగ్గిస్తూ సవరించిన కొత్త బిల్లును అక్కడి ప్రజాప్రతినిధులు ప్రవేశపెట్టారు. ఉక్రెయిన్‌ పై రష్యా జరుపుతున్న సుదీర్ఘ దురాక్రమణను అడ్డుకోవడానికి, మాస్కో ఆర్థిక వనరులను దెబ్బతీయడమే లక్ష్యంగా ఈ చట్టాన్ని తీసుకొస్తున్నట్లు అమెరికా తెలిపింది.
Also Read : ఏజెన్సీపై స్పెషల్ ఫోకస్..!
అమెరికా అధ్యక్షుడు డోనాల్డ్ ట్రంప్ ఆమోదంతో ముందుకు సాగుతున్న ఈ కొత్త బిల్లు ప్రకారం, రష్యా నుంచి ఇంధనాన్ని కొనుగోలు చేసే అగ్ర ఐదు దేశాలపై గరిష్టంగా 100 శాతం వరకు మాత్రమే పన్నులు విధించే అధికారం అధ్యక్షుడికి ఉంటుంది. ప్రస్తుతం రష్యా ముడి చమురును అత్యధికంగా కొనుగోలు చేస్తున్న దేశాల్లో చైనా, భారత్, స్లోవేకియా, హంగేరి, మరియు అజర్‌బైజాన్ మొదటి ఐదు స్థానాల్లో ఉన్నాయి. ఈ సవరణల వల్ల భారత్ వంటి దేశాలపై పడబోయే ఆర్థిక భారం చాలా వరకు తగ్గినప్పటికీ, ఒకవేళ ట్రంప్ గనుక ఈ 100 శాతం లేవీలను విధిస్తే అంతర్జాతీయ వాణిజ్య సంబంధాలపై దాని ప్రభావం పడే అవకాశం ఉంది.
Also Read : ఆ వీడియోలు ఎక్కడ..? గమన అడ్డంగా దొరికిందా..?
ఈ కొత్త వెర్షన్‌ లో కొన్ని దేశాలకు ప్రత్యేక మినహాయింపులు కూడా కల్పించారు. రష్యా మొత్తం సహజ వాయువు ఎగుమతుల్లో 15 శాతం కంటే తక్కువ దిగుమతి చేసుకుంటూ, ఆ దిగుమతులను తగ్గించుకోవడానికి గణనీయమైన చర్యలు తీసుకునే దేశాలకు పన్నుల నుండి మినహాయింపు లభిస్తుంది. దీనివల్ల జపాన్, ఫ్రాన్స్, హంగేరి, బెల్జియం వంటి దేశాలకు మేలు జరగనుంది. అంతేకాకుండా, అమెరికా జాతీయ ప్రయోజనాల దృష్ట్యా అవసరమైతే ఈ ఆంక్షలను పూర్తిగా ఎత్తివేసే ప్రత్యేక అధికారాన్ని కూడా ఈ బిల్లు ద్వారా అధ్యక్షుడు ట్రంప్ కు కల్పించారు. ట్రంప్‌తో జరిపిన చర్చల తర్వాతే ఒరిజినల్ బిల్లులోని కఠిన నిబంధనలను కొంతవరకు సడలించి, అందరి ఆమోదంతో ఈ కొత్త ముసాయిదాను సిద్ధం చేసినట్లు సెనేట్ వర్గాలు తెలిపాయి.
