రక్త పరీక్షల్లో కొలెస్ట్రాల్ స్థాయిలు సాధారణంగా ఉన్నంత మాత్రాన గుండె పూర్తిగా సురక్షితంగా ఉందని భావించలేమని వైద్య నిపుణులు హెచ్చరిస్తున్నారు. ముఖ్యంగా శారీరకంగా సన్నగా, ఫిట్గా కనిపించే భారతీయులలో సాధారణ కొలెస్ట్రాల్ నివేదికలు ఉన్నప్పటికీ గుండెపోటుకు గురవుతున్న వారి సంఖ్య పెరుగుతోంది. కేవలం టోటల్ కొలెస్ట్రాల్ మాత్రమే కాకుండా, గుండె ఆరోగ్యాన్ని దెబ్బతీసే ఇతర ప్రమాదకరమైన లిపిడ్స్ సాధారణ రక్త పరీక్షల్లో బయటపడకపోవడమే దీనికి ప్రధాన కారణం.
Also Read : నదుల అనుసంధానంతో భారత్ ‘అన్స్టాపబుల్’..!
సాధారణ కొలెస్ట్రాల్ ప్యానెల్లో కనిపించకుండా, గుండె ధమనులను దెబ్బతీసే కొన్ని ముఖ్యమైన కారకాల్లో లిపోప్రోటీన్(ఎ) ప్రధానమైనది. ఇది పూర్తిగా జన్యుపరమైన కారణాల వల్ల శరీరంలో పెరుగుతుంది. దీంతో పాటు ఆహారపు అలవాట్ల వల్ల సన్నగా ఉన్నవారిలో కూడా ట్రైగ్లిజరైడ్స్ పెరిగి, ఇన్సులిన్ నిరోధకతకు దారితీయవచ్చు. అలాగే సాధారణ చెడు కొలెస్ట్రాల్ కంటే చాలా చిన్నదిగా ఉండే ‘స్మాల్, డెన్స్ ఎల్డిఎల్’ గుండె ధమనులలో సులభంగా పేరుకుపోయి బ్లాక్స్ ఏర్పరుస్తుంది. చూడటానికి సన్నగా ఉన్నప్పటికీ, కొందరిలో అంతర్గత అవయవాల చుట్టూ కొవ్వు పేరుకుపోతుంది.
Also Read : తిరుపతిలో భూమన భారీ భూబాగోతాలు..!
వైద్య పరిభాషలో దీనిని “థిన్-ఫాట్ ఇండియన్ ఫెనోటైప్” లేదా విసెరల్ ఫ్యాట్ అంటారు. శారీరక శ్రమ లేకపోవడం, కార్బోహైడ్రేట్లు ఎక్కువగా ఉండే ఆహారం తీసుకోవడం వల్ల ఈ ప్రమాదం మరింత పెరుగుతుంది. అందువల్ల గుండె ఆరోగ్యంపై పూర్తి స్పష్టత రావడానికి సాధారణ కొలెస్ట్రాల్ పరీక్షతో పాటు లిపోప్రోటీన్(ఎ) టెస్ట్, అపోబి లెవెల్స్, హెచ్ఎస్-సిఆర్పి వంటి అడ్వాన్స్డ్ పరీక్షలు చేయించుకోవాలని వైద్యులు సూచిస్తున్నారు. గుండెను ఆరోగ్యంగా ఉంచుకోవడానికి రిఫైండ్ కార్బోహైడ్రేట్లు, చక్కెరలను తగ్గించి, ప్రోటీన్ ఆహారాన్ని పెంచాలి. క్రమం తప్పకుండా కార్డియో, స్ట్రెంత్ ట్రైనింగ్ వ్యాయామాలు చేయడం, ధూమపానం మరియు మద్యపానానికి దూరంగా ఉండటం ద్వారా గుండె జబ్బుల ముప్పును తగ్గించుకోవచ్చు.