విశాఖపట్నంలోని రాష్ట్రీయ ఇస్పాత్ నిగమ్ లిమిటెడ్ (ఆర్ఐఎన్ఎల్) స్టీల్ ప్లాంట్లో చోటుచేసుకున్న ఘోర ప్రమాదంలో ఇప్పటివరకు ఎనిమిది మంది ఉద్యోగులు ప్రాణాలు కోల్పోవడం తీవ్ర విషాదాన్ని మిగిల్చింది. ఈ ఘటనపై రాష్ట్ర, కేంద్ర ప్రభుత్వాలు తీవ్ర దిగ్భ్రాంతి వ్యక్తం చేస్తూ బాధిత కుటుంబాలకు అండగా ఉంటామని హామీ ఇచ్చాయి.
ప్రమాదం అనంతరం కేంద్ర ఉక్కు పరిశ్రమల శాఖ మంత్రి హెచ్.డి. కుమారస్వామి, ఆంధ్రప్రదేశ్ ఉపముఖ్యమంత్రి పవన్ కళ్యాణ్, ఐటీ శాఖ మంత్రి నారా లోకేష్, హోంమంత్రి వంగలపూడి అనిత, కేంద్ర మంత్రి కింజరాపు రామ్మోహన్ నాయుడు తదితరులు విశాఖ చేరుకుని బాధిత కుటుంబాలను పరామర్శించారు. అలాగే గాయపడిన ఉద్యోగులను ఆసుపత్రుల్లో కలిసి వారి ఆరోగ్య పరిస్థితిని తెలుసుకున్నారు.
Also Read : ఎల్జీ బాధితులను జగన్ వదిలేశారు.. బాబు ఆదుకున్నారు
ఆర్ఐఎన్ఎల్ యాజమాన్యం మృతుల కుటుంబాలకు రూ.25 లక్షల ఎక్స్గ్రేషియా ప్రకటించింది. అంతేకాకుండా కుటుంబంలోని ఒకరికి ఉద్యోగావకాశం కల్పించడంతో పాటు, మరణించిన ఉద్యోగి పదవీ విరమణ వయస్సు వరకు స్టీల్ ప్లాంట్ క్వార్టర్స్లో నివాసం ఉండే అవకాశం కల్పిస్తామని వెల్లడించింది. పిల్లల విద్య, వైద్య అవసరాలకు కూడా సహకారం అందిస్తామని హామీ ఇచ్చింది. తీవ్రంగా గాయపడిన వారికి మెరుగైన వైద్య సేవలతో పాటు అదనంగా రూ.10 లక్షల ఆర్థిక సహాయం ప్రకటించింది.
ఇక రాష్ట్ర ప్రభుత్వం తరఫున ఉపముఖ్యమంత్రి పవన్ కళ్యాణ్ బాధిత కుటుంబాలకు ప్రత్యేక ఆర్థిక సాయం ప్రకటించారు. ప్రమాదంలో మరణించిన రెగ్యులర్ ఉద్యోగుల కుటుంబాలకు రూ.1.72 కోట్ల వరకు, కాంట్రాక్ట్ కార్మికుల కుటుంబాలకు రూ.45.75 లక్షల వరకు సహాయం అందజేస్తామని తెలిపారు. కుటుంబంలోని ఒకరికి ఉద్యోగం కల్పించడమే కాకుండా, గాయపడిన వారి చికిత్స ఖర్చులన్నీ ప్రభుత్వమే భరిస్తుందని స్పష్టం చేశారు.
Also Read : స్టీల్ ప్లాంట్.. నిర్లక్ష్యంతో బూడిదవుతున్న కార్మికులు..!
ఇలాంటి ప్రమాదాలు ఎంతటి ఆర్థిక సాయం చేసినా తిరిగి ప్రాణాలను తీసుకురాలేవు. అయితే ఇలాంటి క్లిష్ట పరిస్థితుల్లో బాధిత కుటుంబాలకు ప్రభుత్వం అండగా నిలబడటం, వారిలో భరోసా నింపడం అత్యంత అవసరం. ఈ విషయంలో రాష్ట్ర, కేంద్ర ప్రభుత్వాల ప్రతినిధులు వెంటనే స్పందించి బాధితులను పరామర్శించడం, ఆర్థిక సహాయాన్ని ప్రకటించడం ద్వారా తమ బాధ్యతను నిర్వర్తించారని పలువురు అభిప్రాయపడుతున్నారు.
ఒక ప్రమాదం జరిగిన తర్వాత ప్రభుత్వాలు చూపే స్పందన ప్రజల్లో విశ్వాసాన్ని పెంచుతుంది. బాధితుల వద్దకు వెళ్లి పరామర్శించడం, వారి సమస్యలను తెలుసుకోవడం, తక్షణ సహాయక చర్యలు చేపట్టడం వంటి అంశాలు ప్రజాస్వామ్య వ్యవస్థలో ముఖ్యమైన బాధ్యతలుగా భావిస్తారు. విశాఖ ఘటనలో అధికార యంత్రాంగం వేగంగా స్పందించిందనే అభిప్రాయం వ్యక్తమవుతోంది.
Also Read : రెండేళ్ల పాలనపై సర్వే.. ఎవరికెన్ని మార్కులు..?
అయితే ఈ ఘటనపై రాజకీయ విమర్శలు కూడా ప్రారంభమయ్యాయి. ప్రతిపక్ష వైఎస్సార్ కాంగ్రెస్ పార్టీ నేతలు ఇది ప్రభుత్వ వైఫల్యమేనని ఆరోపిస్తూ, విశాఖ ఉక్కు పరిశ్రమ భద్రతా ప్రమాణాలపై ప్రశ్నలు లేవనెత్తుతున్నారు. పరిశ్రమ నిర్వహణ, భద్రతా చర్యలు, కార్మికుల రక్షణ వంటి అంశాలపై ప్రభుత్వం సమగ్ర విచారణ జరపాలని వారు డిమాండ్ చేస్తున్నారు. ప్రజాస్వామ్యంలో ప్రతిపక్షం ప్రభుత్వాన్ని ప్రశ్నించడం సహజం. ప్రభుత్వం తీసుకునే చర్యలపై సందేహాలు వ్యక్తం చేయడం, లోపాలను ఎత్తిచూపడం కూడా వారి బాధ్యతలో భాగమే. అయితే ఇటువంటి విషాద ఘటనల సమయంలో బాధితుల పట్ల సానుభూతి, మానవత్వం కూడా సమానంగా ప్రాధాన్యం సంతరించుకుంటాయి.
వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డి కూడా బాధిత కుటుంబాలను పరామర్శించేందుకు విశాఖ పర్యటన చేపట్టారు. ఈ పర్యటన పూర్తిగా బాధితులను ఓదార్చడానికే పరిమితం అవ్వకుండా కేవలం రాజకీయం చేసేందుకు మాత్రమే జగన్ వినియోగించడం నిజంగా సిగ్గు చేటు. గతంలో ఎల్జీ పాలిమర్స్ సంఘటన జరిగినప్పుడు బాధితుల్ని గాలికొదిలేసిన జగన్, ఇప్పుడు రాజకీయం చేయడం విడ్డూరంగా ఉందని స్థానికులు చర్చించుకుంటున్నారు.
మొత్తానికి విశాఖ స్టీల్ ప్లాంట్లో జరిగిన ఈ దుర్ఘటన రాష్ట్రాన్ని కలచివేసింది. ఇప్పుడు అవసరమైనది బాధిత కుటుంబాలకు న్యాయం చేయడం, భవిష్యత్తులో ఇలాంటి ప్రమాదాలు పునరావృతం కాకుండా కఠిన భద్రతా చర్యలు అమలు చేయడం. అదే నిజమైన నివాళి అవుతుంది.