తమిళ చిత్ర పరిశ్రమలో తిరుగులేని స్టార్ డమ్ సంపాదించుకున్న దళపతి విజయ్, ఇప్పుడు రాజకీయాల్లోనూ సత్తా చాటారు. తమిళనాడు అసెంబ్లీ ఎన్నికల్లో భారీ విజయం సాధించి, ఆయన ముఖ్యమంత్రిగా బాధ్యతలు చేపట్టారు. ఈ చారిత్రాత్మక ఘట్టం విజయ్ అభిమానుల్లో పండగ వాతావరణం నింపగా, అదే సమయంలో ఆయన నటించిన చివరి సినిమా జననాయగన్ విడుదల కోసం వారు కళ్లు కాయలు కాచేలా ఎదురుచూస్తున్నారు. విజయ్ ముఖ్యమంత్రిగా ప్రమాణ స్వీకారం చేసిన వెంటనే ఈ సినిమాకు సంబంధించిన ఒక భారీ అప్డేట్ బయటకు వచ్చింది.
Also Read : జగన్ స్కెచ్ వర్కవుట్ అవుతుందా..?
ఈ కార్యక్రమానికి హాజరైన జననాయగన్ చిత్ర నిర్మాత కె. వెంకట్ నారాయణ మీడియాతో మాట్లాడుతూ సినిమా విడుదల తేదీపై స్పష్టత ఇచ్చారు. గత కొంతకాలంగా సెన్సార్ బోర్డు అభ్యంతరాలు, న్యాయపరమైన చిక్కుల వల్ల వాయిదా పడుతూ వచ్చిన ఈ చిత్రం, ఎట్టకేలకు థియేటర్లలోకి వచ్చేందుకు సిద్ధమైందని ఆయన ప్రకటించారు. సెన్సార్ బోర్డు నుంచి త్వరలోనే క్లియరెన్స్ వస్తుందని భావిస్తున్నామని, సర్టిఫికేట్ అందిన రెండు వారాల్లోపే సినిమాను ప్రపంచవ్యాప్తంగా విడుదల చేస్తామని నిర్మాత స్పష్టం చేసారు.
Also Read : ఐఫోన్ చిప్స్ ఇక ఇంటెల్ మేకింగ్..?
మే నెలలోనే ఈ సినిమాను ప్రేక్షకుల ముందుకు తీసుకురావాలని చిత్ర యూనిట్ ప్లాన్ చేస్తోంది. తాజా సమాచారం ప్రకారం, మే నెలాఖరులోపు విజయ్ చివరి సినిమా వెండితెరపై సందడి చేయనుంది. రాజకీయ నేపథ్యంలో తెరకెక్కిన ఈ చిత్రానికి హెచ్. వినోద్ దర్శకత్వం వహించారు. విజయ్ తన సినీ కెరీర్ లో 69వ, చివరి సినిమాగా దీనిని ప్రకటించడంతో దీనిపై భారీ అంచనాలు నెలకొన్నాయి. ఇప్పుడు ఆయన నిజ జీవితంలో కూడా ముఖ్యమంత్రి కావడంతో, ఈ సినిమా బాక్సాఫీస్ వద్ద సరికొత్త రికార్డులు సృష్టిస్తుందని సినీ విశ్లేషకులు భావిస్తున్నారు.