తమిళ స్టార్ హీరో అజిత్ కుమార్ పుట్టినరోజు సందర్భంగా ఆయన అభిమానులకు బిగ్ సర్ప్రైజ్ ఇచ్చారు. అజిత్ సినీ ప్రయాణం అందరికీ తెలిసిందే. కానీ ఆయనలోని రేసర్ కథను ప్రపంచానికి చాటిచెప్పేలా ‘గ్లాడియేటర్స్’ అనే డాక్యుమెంటరీ గ్లింప్స్ను మేకర్స్ రిలీజ్ చేశారు. ఏఎల్.విజయ్ దర్శకత్వంలో అత్యున్నత సాంకేతిక విలువల మధ్య రూపొందుతున్న ఈ చిత్రం రేసింగ్ ట్రాక్ మీద అజిత్ పడ్డ కష్టం, ఆయన సాధించిన విజయాలు కళ్లకు కట్టబోతోంది. అజిత్ పుట్టినరోజు సందర్భంగా విడుదలైన ‘గ్లాడియేటర్స్’ టీజర్ ఇప్పుడు సోషల్ మీడియాలో సెన్సేషన్ క్రియేట్ చేస్తోంది. ఈ గ్లింప్స్లో రేసింగ్ ట్రాక్పై అజిత్ వేగం, ఆయన ఏకాగ్రతను చూపిస్తూ రూపొందించిన విజువల్స్ అదిరిపోయాయి.
Also Read : హోటల్ తిండి సామాన్యుడికి ఇక గగనమే..?
నటనకు కాసేపు విరామం ఇచ్చి ప్రొఫెషనల్ రేసింగ్పై దృష్టి పెట్టిన అజిత్, తన రేసింగ్ టీమ్ ద్వారా అంతర్జాతీయ స్థాయిలో ఇప్పటికే గుర్తింపు పొందారు. ఈ డాక్యుమెంటరీ చిత్రానికి టాలెంటెడ్ డైరెక్టర్ ఏఎల్.విజయ్ దర్శకత్వం వహిస్తున్నారు. ఆయన తన టీమ్తో కలిసి అజిత్ రేసింగ్ ప్రాక్టీస్ సెషన్స్, గ్లోబల్ రేసింగ్ ఈవెంట్లలో పాల్గొన్న దృశ్యాలను కొంతకాలంగా షూట్ చేస్తున్నారు. ఇది కేవలం ఒక డాక్యుమెంటరీలా కాకుండా, ఒక పక్కా సినిమాటిక్ ఎక్స్పీరియన్స్ను ఇచ్చేలా 4K రిజల్యూషన్లో అత్యంత భారీగా ప్లాన్ చేశారు. జీవీ ప్రకాశ్ కుమార్ అందించిన మ్యూజిక్ గ్లింప్స్కు ప్రధాన బలంగా నిలిచింది. అదిరిపోయే స్కోర్తో రేసింగ్ ట్రాక్పై ఉండే అడ్రినలిన్ రష్ను ఆయన తన సంగీతం ద్వారా ప్రేక్షకులు ఫీలయ్యేలా చేశారు.
గతంలో అజిత్ నటించిన సినిమాలకు పనిచేసిన జీవీ, ఈసారి ఆయన రియల్ లైఫ్ జర్నీకి పవర్ఫుల్ సౌండ్ ట్రాక్ సిద్ధం చేస్తున్నట్లు సమాచారం. ఈ సినిమా సుమారు 90 నిమిషాల నిడివితో ఉండబోతోందని ఇండస్ట్రీ వర్గాల టాక్. కేవలం రేసింగ్ మాత్రమే కాకుండా, అజిత్ వ్యక్తిగత జీవితంలోని కొన్ని భావోద్వేగపూరితమైన అంశాలను కూడా ఇందులో జోడించినట్లు తెలుస్తోంది. గెలవాలనే తపనతో ఆయన పడిన కష్టాన్ని, ప్రమాదాలను అధిగమించి ముందుకు సాగిన వైనాన్ని దర్శకుడు అద్భుతంగా ఆవిష్కరించారు. యువతను ఇన్స్పైర్ చేసేలా ఈ డాక్యుమెంటరీని తీర్చిదిద్దుతున్నారు. కలలు కనే ప్రతి ఒక్కరూ వాటిని నిజం చేసుకోవడానికి ఎలా కష్టపడాలో అజిత్ జర్నీ ద్వారా చూపించబోతున్నారు.
Also Read : టీటీడీకి పవన్ లేఖ.. నానా పాట్లు పడుతున్న వైసీపీ..!
ముఖ్యంగా రేసింగ్ అంటే కేవలం ధనికుల ఆట మాత్రమే కాదు, పట్టుదల ఉంటే ఎవరైనా సాధించవచ్చనే సందేశం ఇందులో ఉండబోతోంది. ప్రస్తుతం అజిత్ తన రేసింగ్ టీమ్ ‘అజిత్ కుమార్ రేసింగ్’ పనులతో పాటు, పలు అంతర్జాతీయ ఛాంపియన్షిప్లలో పాల్గొంటున్నారు. ఆయన రేసింగ్ కెరీర్లోని అత్యుత్తమ క్షణాలన్నీ ఈ డాక్యుమెంటరీలో హైలైట్గా నిలవనున్నాయి. జూన్ 4న ఈ చిత్రాన్ని ప్రపంచవ్యాప్తంగా థియేటర్లలో గ్రాండ్గా రిలీజ్ చేసేందుకు మేకర్స్ సిద్ధమవుతున్నారు. నెట్ఫ్లిక్స్ ఇప్పటికే ఈ డాక్యుమెంటరీ డిజిటల్ హక్కులను భారీ ధరకు సొంతం చేసుకుంది. థియేటర్లలో విడుదలైన కొన్ని వారాల తర్వాత ఇది ఓటీటీలో స్ట్రీమింగ్ కానుంది. అజిత్ ఫ్యాన్స్ మాత్రమే కాకుండా, రేసింగ్ ప్రేమికులు కూడా ఈ ‘గ్లాడియేటర్స్’ కోసం వేయి కళ్ళతో ఎదురుచూస్తున్నారు. మొత్తానికి అజిత్ పుట్టినరోజున వచ్చిన ఈ గ్లింప్స్ ఆయన క్రేజ్ను మరో లెవల్కు తీసుకెళ్లింది. రేసింగ్ ట్రాక్ మీద అజిత్ సృష్టించే వండర్స్ ఎలా ఉండబోతున్నాయో తెలియాలంటే సినిమా రిలీజ్ వరకు ఆగాల్సిందే. ‘గ్లాడియేటర్స్’ రూపంలో అజిత్ తన రియల్ లైఫ్ హీరోయిజాన్ని వెండితెరపై మరోసారి నిరూపించుకోబోతున్నారు.