దేశంలో సహజీవనం చేసే మహిళల హక్కులు మరియు భద్రతకు సంబంధించి దేశ అత్యున్నత న్యాయస్థానం సుప్రీంకోర్టు ఒక చారిత్రాత్మక, సంచలన తీర్పును వెలువరించింది. ఇప్పటివరకు వివాహిత మహిళలకు మాత్రమే వర్తించే ఐపీసీ సెక్షన్ 498-A అంటే గృహ హింస, అత్తమామల వేధింపుల నిరోధక చట్టం పరిధిని సుప్రీంకోర్టు మరింత విస్తరించింది. ఇకపై పెళ్లి కాకుండానే పురుషుడితో కలిసి ఒకే ఇంట్లో సహజీవనం సాగిస్తున్న మహిళలు కూడా భాగస్వామి లేదా అతని కుటుంబ సభ్యుల నుండి శారీరక, మానసిక వేధింపులకు గురైతే ఈ చట్టం కింద రక్షణ పొందవచ్చని తెలిపింది.
Also Read : టీడీపీ అధిష్టానానికి ఉమ్మడి కృష్ణా జిల్లా సెగ..!
నిందితులపై సెక్షన్ 498-A కింద నేరుగా కేసు నమోదు చేయవచ్చని న్యాయస్థానం స్పష్టం చేసింది. ఈ చారిత్రాత్మక తీర్పును వెలువరిస్తున్న సమయంలో సుప్రీంకోర్టు కొన్ని అత్యంత కీలకమైన మార్గదర్శకాలను కూడా జారీ చేసింది. ఈ చట్టం దుర్వినియోగం కాకుండా ఉండేందుకు, సదరు మహిళకు మరియు పురుషుడికి మధ్య భవిష్యత్తులో ఖచ్చితంగా పెళ్లి చేసుకునే ఉద్దేశం ఉండి ఉండాలని కోర్టు పేర్కొంది. కేవలం పెళ్లి చేసుకుంటానని నమ్మించి, భార్యాభర్తల తరహాలోనే సుదీర్ఘకాలం కలిసి జీవించి, ఆ తర్వాత వేధింపులకు గురిచేసే కేసులకు మాత్రమే ఇది వర్తిస్తుందని వివరించింది.
Also Read : టీం ఇండియాకు మళ్ళీ బూమ్రా షాక్..!
అంతేకాకుండా, ఈ చట్టం దుర్వినియోగం కాకుండా మరియు తప్పుడు కేసులను అరికట్టేందుకు గతంలో సుప్రీంకోర్టు ఇచ్చిన ప్రసిద్ధ అర్నేష్ కుమార్ వర్సెస్ స్టేట్ ఆఫ్ బీహార్ కేసు మార్గదర్శకాలను పోలీసులు ఖచ్చితంగా పాటించాలని ఆదేశించింది. ఈ తీర్పు దేశ లీగల్ వ్యవస్థలో ఒక మైలురాయిగా నిలిచిపోతుందని చట్ట నిపుణులు విశ్లేషిస్తున్నారు. మారుతున్న ఆధునిక సమాజంలో సహజీవనం చేసే మహిళల సంఖ్య పెరుగుతున్న తరుణంలో, వారికి చట్టపరమైన రక్షణ కల్పించాల్సిన అవసరం ఎంతైనా ఉందని ధర్మాసనం అభిప్రాయపడింది. నమ్మించి మోసం చేసే పురుషుల బారిన పడకుండా మహిళలకు ఇది ఒక బలమైన రక్షణ కవచంలా మారుతుందని మహిళా సంఘాలు హర్షం వ్యక్తం చేస్తున్నాయి.