ఆంధ్రప్రదేశ్‌లో ఉత్కంఠ రేపిన మున్సిపల్ కార్పొరేషన్ ఎన్నికల ఓట్ల లెక్కింపు ప్రక్రియ అత్యంత వేగంగా కొనసాగుతోంది. రాష్ట్రవ్యాప్తంగా వివిధ నగరపాలక సంస్థలకు జరిగిన ఈ ఎన్నికల ఫలితాల్లో అధికార తెలుగుదేశం, జనసేన, భారతీయ జనతా పార్టీల ఎన్డీయే కూటమి అభ్యర్థులు తమ విజయకేతనాన్ని ఎగురవేసే దిశగా దూసుకుపోతున్నారు. కౌంటింగ్ ప్రారంభమైన మొదటి రౌండ్ నుంచే దాదాపు అన్ని ప్రధాన నగరాల్లోనూ కూటమి అభ్యర్థులు నిలకడగా ఓట్ల ఆధిక్యాన్ని ప్రదర్శిస్తూ ప్రతిపక్ష వైఎస్సార్ కాంగ్రెస్ పార్టీ అభ్యర్థులపై స్పష్టమైన ముందంజలో కొనసాగుతున్నారు.
Also Read :మళ్లీ యాత్రల సమయం.. ఇక రెడీ..!
రాష్ట్రంలోని రాజకీయంగా అత్యంత కీలకమైన కోస్తాంధ్ర, ఉత్తరాంధ్ర నగరాల్లో కూటమి తరఫున బరిలోకి దిగిన అభ్యర్థులు తమ స్థానాలను మొదటి నుంచే పటిష్టం చేసుకుంటూ ఓట్ల మార్జిన్‌ను భారీగా పెంచుకుంటున్నారు. గుంటూరు మున్సిపల్ కార్పొరేషన్‌లో ఎన్డీయే కూటమి మేయర్ అభ్యర్థిగా పోటీ చేసిన టీడీపీ నేత కోవెలమూడి లక్ష్మీ అపర్ణ తన సమీప వైసీపీ ప్రత్యర్థిపై స్పష్టమైన మెజారిటీతో ముందంజలో ఉన్నారు. అదేవిధంగా ఏలూరు కార్పొరేషన్‌లో కూటమి తరఫున గట్టి పోటీ ఇచ్చిన జనసేన పార్టీ అభ్యర్థి రెడ్డి అప్పలనాయుడు మొదటి రౌండ్ నుంచే ఘనమైన ఆధిక్యాన్ని కనబరుస్తూ విజయతీరాలకు చేరుకుంటున్నారు.
Also Read : సాయిరెడ్డి కొత్త పార్టీ వెనుక ఆ ఆరుగురు ఎవరు..?
మరోవైపు ఉత్తరాంధ్రలోని అత్యంత ప్రతిష్టాత్మకమైన గ్రేటర్ విశాఖపట్నం స్మార్ట్ సిటీ కార్పొరేషన్ పరిధిలో టీడీపీ అభ్యర్థి ముక్కా శ్రావణి ప్రత్యర్థులకు గట్టి పోటీ ఇస్తూ భారీ ఓట్ల మెజారిటీతో ముందంజలో నిలిచారు. విజయనగరం మున్సిపల్ కార్పొరేషన్ పరిధిలో తీవ్ర ఉత్కంఠ నడుమ పోటీ చేసిన టీడీపీ అభ్యర్థి అవనపు భార్గవి సైతం క్షేత్రస్థాయిలో స్పష్టమైన ఆధిక్యతను కనబరుస్తూ కూటమి జెండాను ఎగురవేసే దిశగా వేగంగా అడుగులు వేస్తున్నారు. ఇక రాయలసీమ ప్రాంతంలోనూ కూటమి ప్రభంజనం ఏమాత్రం తగ్గకుండా స్పష్టంగా ప్రతిబింబిస్తోంది. చిత్తూరు కార్పొరేషన్‌లో మొదటి నుంచీ పట్టు సాధించిన టీడీపీ అభ్యర్థి కటారి హేమలత భారీ మెజారిటీ దిశగా వెళ్తుండగాగా.. తిరుపతి కార్పొరేషన్ పీఠంపై సైతం కూటమి జెండా ఎగరడం దాదాపు ఖాయమైంది.
