ఆంధ్రప్రదేశ్‌లో స్థానిక సంస్థల ఎన్నికల నిర్వహణ, బీసీ రిజర్వేషన్ల అంశం సరికొత్త లీగల్ టర్న్ తీసుకుంది. స్థానిక సంస్థల ఎన్నికల్లో వెనుకబడిన తరగతులకు 34 శాతం రిజర్వేషన్లు కల్పిస్తూ కూటమి ప్రభుత్వం జారీ చేసిన జీవోలను ఇటీవల ఆంధ్రప్రదేశ్ హైకోర్టు కొట్టివేసిన సంగతి తెలిసిందే. మొత్తం రిజర్వేషన్లు 50 శాతానికి మించకూడదనే నిబంధనను ఉటంకిస్తూ హైకోర్టు ఈ తీర్పునిచ్చింది. అయితే, బీసీలకు ఇచ్చిన హామీకి కట్టుబడి ఉన్నామని స్పష్టం చేసిన ముఖ్యమంత్రి చంద్రబాబు నాయుడు, హైకోర్టు తీర్పును సవాల్ చేస్తూ సుప్రీంకోర్టును ఆశ్రయించాలని అత్యంత వేగంగా అడుగులు వేశారు.
Also Read : Don’t Trouble The Trouble సినిమా రివ్యూ: ఫహద్ ఫాజిల్ మాయాజాలం పనిచేసిందా?
ఈ సున్నితమైన అంశంపై ముఖ్యమంత్రి చంద్రబాబు నాయుడు ఢిల్లీలోని సుప్రీంకోర్టు సీనియర్ న్యాయ నిపుణులు, అడ్వకేట్ జనరల్‌తో సుదీర్ఘంగా చర్చించారు. బీసీలకు 34 శాతం కోటాను చట్టబద్ధంగా ఎలా నిలబెట్టుకోవాలనే లీగల్ కోణాలపై విస్తృతమైన కసరత్తు చేశారు. బీసీల సామాజిక, రాజకీయ ప్రాతినిధ్యాన్ని కాపాడటానికి సుప్రీంకోర్టులో బలమైన పిటిషన్ దాఖలు చేయాలని సీఎం చంద్రబాబు అధికారులను, లీగల్ టీమ్‌ను ఆదేశించారు. దీంతో ప్రభుత్వం తరఫున అత్యున్నత న్యాయస్థానంలో ప్రత్యేక లీవ్ పిటిషన్ దాఖలు చేయడానికి రంగం సిద్ధమైంది.
Also Read : టీటీడీ చైర్మన్‌గా మరో నాయుడు..?
నిజానికి, హైకోర్టు తన తీర్పులో స్థానిక సంస్థల ఎన్నికల ప్రక్రియను ఆరు వారాల్లోగా ప్రారంభించాలని రాష్ట్ర ప్రభుత్వానికి, రాష్ట్ర ఎన్నికల సంఘానికి స్పష్టమైన ఆదేశాలు జారీ చేసింది. అయితే, ఇప్పుడు ఏపీ ప్రభుత్వం బీసీ రిజర్వేషన్ల రక్షణ కోసం సుప్రీంకోర్టుకు వెళ్తుండటంతో.. ఈ చట్టపరమైన ప్రక్రియ ముగిసేవరకు ఎన్నికల షెడ్యూల్ కాస్త ముందుకు జరిగే అవకాశాలు స్పష్టంగా కనిపిస్తున్నాయి. న్యాయపరమైన చిక్కులు వీడి, వార్డుల పునర్విభజన మరియు ఓటర్ల జాబితా సవరణ ప్రక్రియల పూర్తి గడువును పరిగణనలోకి తీసుకుంటే, అక్టోబర్, నవంబర్ నెలల్లో జరగాల్సిన ఈ స్థానిక పోరు కాస్త ఆలస్యమై.. డిసెంబర్ నెలలో నిర్వహించే అవకాశం ఉందని సచివాలయ, రాజకీయ వర్గాల విశ్వసనీయ సమాచారం. బీసీలకు న్యాయం చేసిన తర్వాతే ఎన్నికలకు వెళ్లాలనే పట్టుదలతో ప్రభుత్వం ఉండటంతో ఈ తాత్కాలిక వాయిదా దాదాపు ఖాయంగా కనిపిస్తోంది.