బ్రిటన్ రాజకీయాల్లో మరోసారి సంచలనం నమోదైంది. యూకే ప్రధానమంత్రి కీర్ స్టార్మర్ తన పదవికి రాజీనామా చేస్తున్నట్లు అధికారికంగా ప్రకటించారు. తన సొంత లేబర్ పార్టీకి చెందిన ఎంపీల నుంచి గత కొద్దికాలంగా వస్తున్న తీవ్రమైన రాజకీయ ఒత్తిడి కారణంగా ఆయన ఈ అనూహ్య నిర్ణయం తీసుకున్నారు. ప్రధాని పదవితో పాటు లేబర్ పార్టీ నాయకత్వ బాధ్యతల నుంచి కూడా తప్పుకుంటున్నట్లు ఆయన స్పష్టం చేశారు. లండన్ లోని 10 డౌనింగ్ స్ట్రీట్ అధికారిక నివాసం వెలుపల కీర్ స్టార్మర్ తన రాజీనామా పత్రాన్ని చదివి వినిపించారు.
Also Read : పవన్ కు ఆ శాఖ కూడా..? దసరా తర్వాత ఏపీ కేబినెట్ లో మార్పులు..!
ఈ సందర్భంగా ఆయన మాట్లాడుతూ.. “నేను తీసుకున్న ప్రతి నిర్ణయం నేను ఎంతగానో ప్రేమించే నా దేశ ప్రయోజనాల కోసమే” అని భావోద్వేగానికి గురయ్యారు. గత రెండేళ్ల కిందట భారీ మెజారిటీతో అధికారంలోకి వచ్చిన తర్వాత ఆర్థిక వృద్ధి, వేతనాల పెంపు, రక్షణ రంగానికి నిధులు మరియు పేదరిక నిర్మూలన కోసం తన ప్రభుత్వం ఎంతో కృషి చేసిందని ఈ సందర్భంగా స్టార్మర్ గుర్తుచేసుకున్నారు. అయితే, గత ఎన్నికల్లో ఇచ్చిన వాగ్దానాలను నెరవేర్చడంలో, ప్రజల జీవన ప్రమాణాలను మెరుగుపరచడంలో స్టార్మర్ ప్రభుత్వం విఫలమైందని పార్టీ లోపల, వెలుపల తీవ్ర విమర్శలు వచ్చాయి.
Also Read : బ్రాండ్ ఏపీ ప్రమోషన్.. ఢిల్లీలో మంత్రి నారా లోకేష్
ముఖ్యంగా లేబర్ పార్టీలో ఆయన ప్రత్యర్థి అయిన ఆండీ బర్న్ హామ్ పార్లమెంట్ స్థానాన్ని గెలుచుకుని, లీడర్ షిప్ ఛాలెంజ్ కు సిద్ధమవడంతో స్టార్మర్ పై ఒత్తిడి మరింత పెరిగింది. దాదాపు 100 మందికి పైగా లేబర్ పార్టీ ఎంపీలు ఆయనను తక్షణమే పదవి నుంచి తప్పుకోవాలని బహిరంగంగా డిమాండ్ చేయడంతో ఆయనకు రాజీనామా తప్పనిసరైంది. కీర్ స్టార్మర్ రాజీనామాతో బ్రిటన్ దేశం గత దశాబ్ద కాలంలోనే 7వ ప్రధానమంత్రిని చూడబోతోంది. గత రెండు శతాబ్దాల బ్రిటన్ చరిత్రలో ఇంత వేగంగా దేశ అధినేతలు మారడం ఇదే అత్యధికం. ప్రజాసేవల్లో వైఫల్యం, ఆర్థిక సమస్యలు, అక్రమ వలసల వంటి దీర్ఘకాలిక సమస్యలను పరిష్కరించడంలో వరుస ప్రభుత్వాలు విఫలమవుతుండటంతో యూకే రాజకీయాల్లో తీవ్ర అస్థిరత కొనసాగుతోంది.