పశ్చిమ బెంగాల్ రాజకీయ పరిణామాలు ఆసక్తిని రేపుతున్నాయి. రాజకీయంగా అత్యంత ప్రాధాన్యత సంతరించుకున్న ఎన్నికల ఫలితాల్లో.. తమ పార్టీ ఓటమిని జీర్ణించుకోలేని మమతా బెనర్జీ.. తాజాగా సిఎం పదవికి రాజీనామా చేసే ప్రసక్తే లేదని స్పష్టం చేస్తున్న నేపధ్యంలో.. ఇక్కడ రాజ్యాంగం ఏం చెప్తుంది అనే దానిపై ఆసక్తి నెలకొంది. రాజ్యాంగ నిబంధనల ప్రకారం.. మెజారిటీ కోల్పోయిన ప్రభుత్వం అధికారంలో కొనసాగే అవకాశం లేదు. ఒకవేళ అసెంబ్లీలో బీజేపీ స్పష్టమైన మెజారిటీ సాధించి, టీఎంసీ ఓడిపోయినప్పటికీ మమతా బెనర్జీ రాజీనామాకు నిరాకరిస్తే, ఆమె ముఖ్యమంత్రిగా కొనసాగడం అసాధ్యం.
Also Read : ఏపీ ఐపీఎస్ ను వదలని హీరోయిన్ కేసు.. డ్యూటీ కష్టమే..!
భారత రాజ్యాంగంలోని ఆర్టికల్ 164 ప్రకారం, ముఖ్యమంత్రి, మంత్రిమండలి శాసనసభకు జవాబుదారీగా ఉండాలి. అంటే, సభలో మెజారిటీ సభ్యుల మద్దతు ఉన్నంత కాలం మాత్రమే ఒక ప్రభుత్వం అధికారంలో ఉండటానికి అర్హత కలిగి ఉంటుంది. ఒకసారి మెజారిటీని కోల్పోయిన తర్వాత, ఆ ప్రభుత్వం రాజ్యాంగబద్ధమైన తన ఉనికిని కోల్పోతుంది. అటువంటి క్లిష్ట పరిస్థితుల్లో గవర్నర్ తనకున్న విశేషాధికారాలను ఉపయోగించి చర్యలు చేపట్టవచ్చు. మెజారిటీ లేని ముఖ్యమంత్రిని, మంత్రివర్గాన్ని గవర్నర్ వెంటనే పదవి నుంచి తొలగించే అధికారం కలిగి ఉంటారు.
Also Read : గెలుపు గుర్రంగా మహిళా ఉచిత ప్రయాణ పథకాలు!
అనంతరం, సభలో తగిన సంఖ్యాబలం కలిగిన పార్టీని ప్రభుత్వాన్ని ఏర్పాటు చేయవలసిందిగా గవర్నర్ ఆహ్వానిస్తారు. కాబట్టి, ఒక ముఖ్యమంత్రి కేవలం రాజీనామా చేయడానికి నిరాకరించినంత మాత్రాన నిరవధికంగా అధికారంలో ఉండటం సాధ్యం కాదు. ప్రజాస్వామ్య వ్యవస్థలో సంఖ్యాబలం ప్రాతిపదికన మాత్రమే అధికారం నిర్ణయించబడుతుందని రాజ్యాంగం చెప్తోంది. ఒకవేళ ముఖ్యమంత్రి మొండిగా వ్యవహరిస్తే, రాజ్యాంగ సంక్షోభం తలెత్తకుండా గవర్నర్ జోక్యం చేసుకుని, మెజారిటీ ఉన్న పార్టీకి పగ్గాలు అప్పగించడం ద్వారా ప్రజాస్వామ్య ప్రక్రియను పూర్తి చేస్తారు.