ఒంగోలు నియోజకవర్గంలో గత కొన్ని రోజులుగా రాజుకుంటున్న టీడీపీ ఎమ్మెల్యే దామచర్ల జనార్థన్, జనసేన సీనియర్ నేత బాలినేని శ్రీనివాసరెడ్డి మధ్య వివాదం చివరకు కూటమి పార్టీల అధిష్ఠానాల వద్దకు చేరింది. స్థానికంగా ఇరు వర్గాల మధ్య సోషల్ మీడియా వేదికగా, అలాగే క్షేత్రస్థాయిలో నడుస్తున్న ఈ కోల్డ్ వార్పై ముఖ్యమంత్రి చంద్రబాబు నాయుడు, జనసేన అధినేత పవన్ కళ్యాణ్ సీరియస్ అయ్యారు. రాబోయే స్థానిక సంస్థల ఎన్నికల వేళ ఈ వివాదం కూటమి ప్రతిష్టను దెబ్బతీయకూడదనే ఉద్దేశంతో ఈ వివాదానికి వీలైనంత త్వరగా ముగింపు పలకాలని కూటమి పెద్దలు గట్టిగా ఫోకస్ పెట్టారు.
Also Read : విశాఖకు రెడ్ అలెర్ట్.. బీ కేర్ ఫుల్..!
ఈ వివాదానికి సంబంధించి పూర్తి వివరాలు తెలుసుకునేందుకు తెలుగుదేశం పార్టీ అధిష్ఠానం కీలక అడుగు వేసింది. ఈ నెల 13వ తేదీన మంగళగిరిలోని టీడీపీ కేంద్ర కార్యాలయానికి రావాల్సిందిగా ఒంగోలు ఎమ్మెల్యే దామచర్ల జనార్థన్కు ఆదేశాలు జారీ చేసింది. బాలినేని శ్రీనివాసరెడ్డితో వస్తున్న గ్యాప్, స్థానిక వివాదాలు మరియు నియోజకవర్గ పరిణామాలపై నేరుగా వచ్చి వివరణ ఇవ్వాలని పార్టీ అధిష్ఠానం దామచర్లను కోరింది. అధిష్ఠానం నుంచి పిలుపు రావడంతో ఒంగోలు రాజకీయాల్లో ఈ నెల 13న జరగబోయే భేటీ తీవ్ర ప్రాధాన్యత సంతరించుకుంది.
Also Read : అంతా గందరగోళం.. కేంద్రానికి వరుస షాకులు..!
మరోవైపు, ఈ వివాదాన్ని సద్దుమణిగించడానికి మరియు కూటమి పార్టీల మధ్య పూర్తిస్థాయి సమన్వయం కోసం జనసేన పార్టీ అగ్రనేతలు కూడా రంగంలోకి దిగారు. తాజాగా బాలినేని శ్రీనివాసరెడ్డితో మాట్లాడిన జనసేన అగ్రనేతలు.. ఈ వ్యవహారంలో ఎట్టి పరిస్థితుల్లోనూ సంయమనం పాటించాలని, దూకుడుగా ఎలాంటి ప్రకటనలు చేయవద్దని సూచించారు. కూటమి ప్రభుత్వ లక్ష్యాలకు లోబడి, ఎలాంటి విభేదాలకైనా చర్చల ద్వారానే పరిష్కారం వెతుకుదామని బాలినేనికి జనసేన పెద్దలు స్పష్టం చేశారు. ప్రస్తుతానికి ఇరు పార్టీల అధిష్ఠానాలు జోక్యం చేసుకోవడంతో ఒంగోలు కూటమి నేతల మధ్య తాత్కాలికంగా మంటలు చల్లారినట్లు కనిపిస్తోంది. ఈ నెల 13న దామచర్ల జనార్థన్ ఇచ్చే వివరణ ఆధారంగా.. ఇరు నేతలను ఒకే వేదికపైకి తెచ్చి వివాదాన్ని పూర్తిగా ముగించేలా చంద్రబాబు, పవన్ కళ్యాణ్ ఒక సంయుక్త ప్లాన్ సిద్ధం చేస్తున్నట్లు రాజకీయ వర్గాల్లో టాక్ నడుస్తోంది.