లోక్‌సభ ప్రతిపక్ష నేత రాహుల్ గాంధీ చేసిన ఆరోపణలపై భారత ఎన్నికల సంఘం తీవ్రంగా స్పందించింది. ఓటర్ల జాబితా ప్రత్యేక సవరణ ప్రక్రియలో భాగంగా, ఆన్‌లైన్ ఫామ్-6లో ప్రధాన ఎన్నికల కమిషనర్ జ్ఞానేష్ కుమార్ నిబంధనలకు విరుద్ధంగా ఏకపక్షంగా మార్పులు చేశారంటూ రాహుల్ గాంధీ ఆరోపించారు. ఈ ఆరోపణలు పూర్తిగా తప్పుదారి పట్టించేవి అని ఈసీఐ స్పష్టం చేసింది. సోషల్ మీడియా ప్లాట్‌ఫారమ్ X వేదికగా ఎన్నికల సంఘం ఈ ఆరోపణలపై ఫ్యాక్ట్-చెక్ పోస్ట్ పెట్టింది.
Also Read : అమరావతిలో కేటీఆర్ టీమ్‌ భారీ పెట్టుబడులు..?
2025 జూన్ 24న బీహార్‌లో ప్రారంభించిన ఈ ‘SIR’ ప్రక్రియకు సంబంధించిన ఆర్డర్.. కమిషన్ యొక్క ఏకగ్రీవ ఆమోదంతోనే జరిగిందని తెలిపింది. అంతేకాకుండా, ఈ నిర్ణయాన్ని 2026 మే 27 నాటి తీర్పులో గౌరవ సుప్రీంకోర్టు కూడా సమర్థించిందని ఎన్నికల సంఘం గుర్తు చేసింది. ఎన్నికల సంఘం వివరణ ఇచ్చినప్పటికీ, ఈ వివాదానికి సంబంధించిన ప్రధాన అంశంపై సుప్రీంకోర్టులో కీలక విచారణ జరిగింది. మొదటిసారి ఓటరుగా నమోదు చేసుకునే పౌరులు ఉపయోగించే ఈ ఫామ్-6 లో.. “తాము లేదా తమ తల్లిదండ్రులు గత సవరణలో మ్యాప్ చేయబడ్డారా..?” అనే కొత్త నిబంధనను ఆన్‌లైన్ ఫామ్‌లో చేర్చారు.
Also Read : రాయలసీమలో చంద్రబాబు మార్క్.. డ్రిప్‌ ఇరిగేషన్‌ నుంచి హార్టీకల్చర్ హబ్‌ వరకు
ఇలా మార్పులు చేసిన ఫామ్-6 కు తాము ఎలాంటి ఆమోదం తెలపలేదని భారత ప్రధాన న్యాయమూర్తి జస్టిస్ సూర్యకాంత్ నేతృత్వంలోని బెంచ్ స్పష్టం చేసింది. “మేము ఎలాంటి మోడిఫైడ్ ఫామ్-6 ను ఆమోదించలేదు. అసలు ఈ మార్పులు ఎవరు చేశారో అధికారిక రికార్డులను తెప్పించి పరిశీలిస్తాం” అని సీజేఐ పేర్కొన్నారు. ఈ ఫామ్-6 మార్పులపై సీఈసీ జ్ఞానేష్ కుమార్‌తో పాటు ఇతర అధికారులపై చర్యలు తీసుకోవాలని దాఖలైన పిటిషన్‌ను విచారించిన కోర్టు, అసలు ఈ మార్పుల వెనుక ఎవరున్నారనే రికార్డులను పరిశీలించబోతుండటంతో ఇప్పుడు దేశవ్యాప్తంగా ఈ అంశం హాట్ టాపిక్‌గా మారింది.
