తెలంగాణ రాష్ట్ర రోడ్డు రవాణా సంస్థలో పనిచేస్తున్న ఒక కండక్టర్, డ్రైవర్ తమ అసాధారణ నిజాయితీని చాటుకుని అందరి ప్రశంసలు అందుకుంటున్నారు. షాద్‌నగర్‌కు చెందిన వ్యాపారవేత్త జహంగీర్ తన భార్యతో కలిసి పవిత్ర హజ్ యాత్రకు వెళ్లేందుకు సిద్ధమయ్యారు. అందుకోసం అవసరమైన రూ. 3 లక్షల నగదు ఉన్న బ్యాగుతో శనివారం నాడు వారు హైదరాబాద్‌కు ఆర్టీసీ బస్సులో ప్రయాణించారు. అయితే, హైదరాబాద్‌లోని అఫ్జల్‌గంజ్ వద్ద బస్సు దిగి నాంపల్లి వైపు వెళ్తున్న క్రమంలో.. తాము ప్రయాణించిన బస్సులోనే రూ. 3 లక్షలు ఉన్న బ్యాగును మరిచిపోయినట్లు జహంగీర్ ఒక్కసారిగా గుర్తించారు.
Also Read : ఉప్పాడ తీర ప్రాంత రక్షణ గోడ డిజైన్.. ఫలించిన పవన్ కృషి
మరోవైపు, బస్సు అఫ్జల్‌గంజ్ దాటిన తర్వాత సీటు వద్ద ఒక బ్యాగును కండక్టర్ సరిత గమనించారు. వెంటనే ఆమె డ్రైవర్ నరసింహులును అప్రమత్తం చేసి, ఇద్దరూ కలిసి ఆ బ్యాగును, అందులోని రూ. 3 లక్షల నగదును భద్రపరిచారు. బ్యాగు పోగొట్టుకున్న విషయాన్ని గ్రహించిన జహంగీర్ తీవ్ర ఆందోళనతో ఒక ప్రైవేట్ వాహనంలో బస్సు ఉన్న చోటుకు వేగంగా చేరుకున్నారు. కండక్టర్ సరిత, డ్రైవర్ నరసింహులు అతని వివరాలను క్షుణ్ణంగా పరిశీలించి, సరైన యజమాని అని నిర్ధారించుకున్న తర్వాత పూర్తి నగదును అతనికి సురక్షితంగా అప్పగించారు.
Also Read : గుహలోంచి బయటకొచ్చిన కూన.. సింహంగా అడుగుపెడుతున్న మోక్షజ్ఞ!
హజ్ యాత్ర వంటి పవిత్రమైన ప్రయాణానికి వెళ్తున్న సమయంలో అంత పెద్ద మొత్తాన్ని పోగొట్టుకుని తీవ్ర కంగారులో ఉన్న ఆ ప్రయాణికుడికి, ఆర్టీసీ సిబ్బంది సకాలంలో స్పందించి డబ్బులు తిరిగి ఇవ్వడం పెద్ద ఊరటనిచ్చింది. సమయస్ఫూర్తితో వ్యవహరించి తమ బాధ్యతను, నిజాయితీని నిరూపించుకున్న కండక్టర్ సరిత మరియు డ్రైవర్ నరసింహులుపై ప్రస్తుతం సోషల్ మీడియాతో పాటు ఉన్నతాధికారుల నుండి ప్రశంసల జల్లు కురుస్తోంది. ఈ వార్త ఇప్పుడు సోషల్ మీడియాలో వైరల్ గా మారింది.
