ఆంధ్రప్రదేశ్ జీవనాడి, జాతీయ సాగునీటి ప్రాజెక్టు అయిన పోలవరం నిధుల విడుదల మరియు నిర్మాణ పురోగతిపై కేంద్ర ప్రభుత్వం పార్లమెంట్ వేదికగా అత్యంత కీలకమైన స్పష్టత ఇచ్చింది. గత ఐదు ఆర్థిక సంవత్సరాల కాలంలో (2021-2026 మధ్య) ప్రాజెక్టు నిర్మాణ పనులను వేగవంతం చేసేందుకు కేంద్రం నిరంతరం నిధులను మంజూరు చేస్తోందని స్పష్టం చేసింది. ఇందులో భాగంగా ఈ ఐదేళ్ల వ్యవధిలో మొత్తం రూ. 12,620.53 కోట్లను రాష్ట్రానికి విడుదల చేసినట్లు వెల్లడించింది. అంతేకాకుండా, ప్రాజెక్టు మొదటి దశ పనుల కోసం సవరించిన అంచనా వ్యయం రూ. 30,436.95 కోట్లకు కేంద్ర కేబినెట్ ఇదివరకే అధికారికంగా ఆమోదం తెలిపిన విషయాన్ని ఈ సందర్భంగా గుర్తుచేసింది.
Also Read : స్థానిక పోరు.. రణమా.. రణరంగమా..?
ప్రస్తుతం ప్రాజెక్టు ఇంజనీరింగ్ పనుల పురోగతి సంతృప్తికరంగా సాగుతోందని, ప్రధానమైన స్పిల్‌వే నిర్మాణంతో పాటు అత్యంత కీలకమైన ఎర్త్-కం-రాక్‌ఫిల్ డ్యామ్ పనులు చివరి దశకు చేరుకున్నాయని కేంద్రం వివరించింది. డ్యామ్ భద్రత, నాణ్యత విషయంలో ఎక్కడా కాంప్రమైజ్ కాకుండా పనులు జరుపుతున్నట్లు పేర్కొంది. మరోవైపు ముంపు ప్రాంతాల నిర్వాసితుల పునరావాసానికి అత్యున్నత ప్రాధాన్యత ఇస్తున్నామని తెలిపింది. ఇందులో భాగంగా ఇప్పటివరకు 17,892 కుటుంబాలను సురక్షిత ప్రాంతాలకు తరలించి పునరావాసం కల్పించామని, ఆర్ & ఆర్ పనులు మరియు పరిహారం చెల్లింపుల కోసం ఇప్పటివరకు రూ. 1,373.01 కోట్లు ఖర్చు చేసినట్లు సమగ్ర నివేదిక సమర్పించింది.
Also Read : ఎల్ నినో కరవుపై పట్టిసీమ విజయం..!
ఇక ప్రాజెక్టు ప్రారంభం, నిధుల వినియోగం మరియు సాంకేతిక అంశాలను దృష్టిలో ఉంచుకుని ఫేజ్-I పూర్తికి సంబంధించిన గడువుపై కేంద్ర ప్రభుత్వం ప్రకటన చేసింది. మొదటి దశ పనులను సమగ్రంగా ముగించేందుకు గతంలో నిర్దేశించిన మార్చి 2026 లక్ష్యానికి అదనంగా మరో ఏడాది కాలాన్ని అంటే.. మార్చి 2027 వరకు పొడిగిస్తున్నట్లు స్పష్టం చేసింది. సీపేజ్ సమస్యల పరిష్కారం, డ్యామ్ స్థిరత్వం పెంచడం మరియు ఏ ఒక్క నిర్వాసిత కుటుంబానికి అన్యాయం జరగకుండా పునరావాస ప్రక్రియను సంపూర్ణంగా పూర్తి చేయాలనే ఉద్దేశంతోనే ఈ అదనపు ఏడాది గడువును కేటాయించినట్లు కేంద్రం ప్రకటించింది.
