ఆంధ్రప్రదేశ్ మద్యం కేసు దర్యాప్తులో ఇప్పటికీ స్పష్టమైన ముగింపు కనిపించడం లేదు. ఈ కేసులో ఎన్ఫోర్స్మెంట్ డైరెక్టరేట్ (ఈడీ) అధికారులు విచారణ కొనసాగిస్తూ కీలక వ్యక్తులను ప్రశ్నించినప్పటికీ, మరికొందరిని విచారించిన తరువాతే పూర్తి స్థాయి స్పష్టత వచ్చే అవకాశాలు ఉన్నాయని భావిస్తున్నారు. ఇదే సమయంలో చెవిరెడ్డి భాస్కర్ రెడ్డి సహా పలువురు నిందితులు బెయిల్పై విడుదల కాగా, ఈ కేసులో కీలకంగా పేర్కొనబడుతున్న రాజ్ కసిరెడ్డి మాత్రం ఇంకా జైలులోనే ఉన్నారు. ఆయన పలుమార్లు బెయిల్ పిటిషన్లు దాఖలు చేసినప్పటికీ, ఇప్పటివరకు ఎలాంటి ఉపశమనం లభించలేదు.
Also Read : సెలవు పై ఐఏఎస్ కాటమనేని..!
తాజాగా ఈ వ్యవహారంపై విచారణ సందర్భంగా సుప్రీం కోర్టు కీలక వ్యాఖ్యలు చేసింది. ప్రధాన న్యాయమూర్తి జస్టిస్ సూర్యకాంత్ మాట్లాడుతూ, అధికారుల సహకారం లేకుండా ఇలాంటి విస్తృత స్థాయి కుంభకోణాలు జరగవని వ్యాఖ్యానించడం రాజకీయ వర్గాల్లో సంచలనం రేపింది. ఈ కుంభకోణంలో పాత్ర వహించిన అధికారులపై ఎలాంటి చర్యలు లేకపోవడం, అరెస్టులు జరగకపోవడం విచారకరమని ఆయన పేర్కొన్నారు. లిక్కర్ కుంభకోణం పరిమాణపరంగా చాలా పెద్దదిగా ఉందని అత్యున్నత న్యాయస్థానం అభిప్రాయపడింది. రాజ్ కసిరెడ్డి పాత్రపై కూడా కోర్టు పలు కీలక వ్యాఖ్యలు చేసింది. ఆయనను కేవలం సలహాదారుగా చూడలేమని, ఈ వ్యవహారానికి రూపకర్తగా (ఆర్కిటెక్ట్) పరిగణించాల్సిన అవసరం ఉందని వ్యాఖ్యానించింది.
Also Read : బిల్డప్ అదుర్స్.. బొమ్మ అట్టర్ ఫ్లాప్..!
ఈ కుంభకోణంలో పలువురు లబ్ధిదారులు ఉన్నప్పటికీ, ప్రధాన సూత్రధారి కసిరెడ్డేనని కోర్టు అభిప్రాయపడింది. నిర్ణయాధికార స్థానాల్లో ఉన్నవారి ప్రోత్సాహం లేకుండా అధికారులు ఈ స్థాయిలో వ్యవహరించే అవకాశం లేదని స్పష్టం చేసింది. ఇక రాజ్ కసిరెడ్డి ఇప్పటికే తొమ్మిది నెలలకు పైగా జైలులో ఉన్నారని ఆయన తరఫు న్యాయవాదులు వాదించినప్పటికీ, దర్యాప్తు పూర్తయ్యే వరకు బెయిల్ మంజూరు చేయడం సాధ్యం కాదని సుప్రీం కోర్టు వ్యాఖ్యానించినట్లు తెలిసింది. దీంతో ఈ కేసు తదుపరి పరిణామాలపై రాజకీయ, న్యాయ వర్గాల్లో ఆసక్తి కొనసాగుతోంది.