కేంద్ర ఎన్నికల సంఘంలో అంతర్గత విభేదాలు, నిర్ణయాలపై వ్యతిరేకత వ్యక్తమవుతున్నట్లు వస్తున్న ఆరోపణల నేపథ్యంలో, కీలక అధికారుల బాధ్యతలకు సంబంధించి ఒక కొత్త పర్యవేక్షణ ఉత్తర్వును కమిషన్ జారీ చేసింది. ముఖ్యంగా వివాదంలో చిక్కుకున్న ఐటీ విభాగంపై అదనపు నిఘా, నియంత్రణను ఏర్పాటు చేస్తూ ఈ నిర్ణయం తీసుకున్నారు. నవంబర్ 4న జారీ చేసిన ఈ కొత్త పని విభజన ఉత్తర్వు ప్రకారం కీలక మార్పులు జరిగాయి. ఎన్నికల సంఘం ఐటీ విభాగం డైరెక్టర్ జనరల్ సీమా ఖన్నాకు పర్యవేక్షకుడిగా సీనియర్ డిప్యూటీ ఎలక్షన్ కమిషనర్ పవన్ కుమార్ శర్మను నియమించారు.
Also Read: ఏపీపీఎస్సీ గ్రూప్-1 కేసు.. ఈడీ సంచలన ప్రకటన..!
ఇకపై ఐటీ, ఐసీటీ, ప్రజా ఫిర్యాదుల విభాగానికి సంబంధించిన అన్ని ఫైళ్లను ఆమె సీనియర్ డిఈసీ ద్వారానే ముందుకు పంపాల్సి ఉంటుంది. ఓటర్ల జాబితా డిజిటల్ మౌలిక వసతుల కేంద్రీకరణ, సాఫ్ట్‌వేర్ నియంత్రణల ద్వారా రాష్ట్రాల అధికారులకు యాక్సెస్ నిరాకరించడం వంటి వివాదాలు ఈ ఐటీ విభాగం చుట్టూనే రేగాయి. గతంలో వివాదాస్పద జూలై 28 నాటి ఉత్తర్వును జారీ చేసిన సీనియర్ డిప్యూటీ ఎలక్షన్ కమిషనర్ మనీష్ గార్గ్ తన వద్దే ఉన్న ఎలక్షన్ ప్లానింగ్ బాధ్యతలను కొనసాగిస్తారు.
Also Read; పోలవరం ఇప్పట్లో కష్టమేనా..? కీలక పరిణామాల దిశగా అడుగులు..!
అయితే, ఆయనకు సహాయకుడిగా డిప్యూటీ ఎలక్షన్ కమిషనర్ ప్రకాష్ రాజ్‌పురోహిత్‌ను కేటాయించారు. అలాగే ఎలక్షన్ ప్లానింగ్‌కు సంబంధించిన ఫైళ్లను రాజ్‌పురోహిత్.. గార్గ్ ద్వారానే పంపాల్సి ఉంటుంది. గత జూలై మాసంలో కమిషనర్లను సంప్రదించకుండా ఏకపక్షంగా పని విభజన జరిగిందంటూ ఎలక్షన్ కమిషనర్లు ఎస్.ఎస్. సంధు, వివేక్ జోషి క్యాబినెట్ సెక్రటరీకి లేఖలు రాయడం అప్పట్లో తీవ్ర దుమారం రేపింది. అప్పట్లో జారీ చేసిన జూలై 28 నాటి ఉత్తర్వులను జూలై 30న రద్దు చేశామని, అది ఎప్పుడూ అమలు కాలేదని ఈడీ ఇప్పటికే సుప్రీంకోర్టుకు అఫిడవిట్ సమర్పించింది. ఈ అంతర్గత వివాదాలపై కమిషన్ లోపల భిన్నాభిప్రాయాలు ఉన్నట్లు వార్తలు వచ్చినా, తాజా నిర్ణయాలన్నీ కమిషనర్లు ఏకగ్రీవంగానే తీసుకున్నట్లు ఎన్నికల సంఘం వర్గాలు స్పష్టం చేశాయి.
