తిరుమల తిరుపతి దేవస్థానం పాలకమండలి పునర్వ్యవస్థీకరణ, పవిత్ర క్షేత్రంలో వివాదాస్పద నిర్ణయాలు, ఆలయ పాలనా వ్యవహారాలపై వైఎస్సార్‌సీపీ మాజీ ఎంపీ విజయసాయిరెడ్డి సంచలన వ్యాఖ్యలు చేశారు. తాము మళ్లీ అధికారంలోకి వచ్చిన వెంటనే ప్రస్తుతం పనిచేస్తున్న టీటీడీ బోర్డును తక్షణమే రద్దు చేస్తామని సవాల్ విసిరారు. కలియుగ దైవం శ్రీవెంకటేశ్వర స్వామి వారి క్షేత్రాన్ని, పవిత్రమైన ధార్మిక వ్యవస్థలను రాజకీయ నాయకాల పునరావాస కేంద్రాలుగా మార్చడం ఎంతమాత్రం సరికాదని ఆయన విమర్శించారు.
Also Read : మరి షమీ, సిరాజ్ సంగతేంటి.? అసలు మీ ప్లాన్ ఏంటి..?
తిరుమల శ్రీవారి ఆలయ ఆధ్యాత్మికతను, పవిత్రతను పరిరక్షించడమే ధ్యేయంగా నూతన పాలనా విధానాలను రూపుదిద్దుతామని విజయసాయిరెడ్డి స్పష్టం చేశారు. భవిష్యత్తులో తాము ఏర్పాటు చేయబోయే నూతన టీటీడీ బోర్డులో రాజకీయ నాయకులకు ఎలాంటి ప్రవేశం లేకుండా చూస్తామన్నారు. రాజకీయ జోక్యానికి శాశ్వతంగా ముగింపు పలుకుతూ.. కేవలం హిందూ ధర్మాన్ని పరిరక్షించే ఆధ్యాత్మిక నిష్ణాతులు, వేద పండితులు, మఠాధిపతులు మరియు పఠాధిపతులకు మాత్రమే ఈ అత్యున్నత పాలకమండలిలో స్థానం కల్పిస్తామని స్పష్టం చేశారు.
Also Read : ఉత్తరాంధ్రలో ఊడుతున్న రెక్కలు.. జగన్ పై నమ్మకం పోతుందా..?
ఈ లక్ష్య సాధన కోసం అవసరమైతే చట్టసభల్లో ప్రస్తుతం ఉన్న టీటీడీ చట్టానికి ప్రత్యేక సవరణలు తీసుకువస్తామని వెల్లడించారు. రాజకీయ ప్రయోజనాల కోసం ఆలయ వ్యవస్థను వాడుకోవడం వల్ల భక్తుల మనోభావాలు దెబ్బతింటున్నాయని, రాజకీయ ప్రమేయం లేనప్పుడే దేవాలయాల పరిపాలన అత్యంత పారదర్శకంగా, పవిత్రంగా, భక్తిశ్రద్ధలతో జరుగుతుందని ఆయన అభిప్రాయపడ్డారు. అంతేకాకుండా, తిరుమలలో స్వామివారి నిత్య సేవలు, శ్రీవారి ఆస్తుల రక్షణ, భక్తుల సౌకర్యాల విస్తరణ, టీటీడీకి వచ్చే నిధులను కేవలం హిందూ ధర్మ ప్రచారానికే వినియోగించేలా సరికొత్త ధార్మిక విధానాన్ని అమలు చేస్తామని ఆయన హామీ ఇచ్చారు. ప్రస్తుతం విజయసాయిరెడ్డి చేసిన ఈ సంచలన వ్యాఖ్యలు ఆంధ్రప్రదేశ్ రాజకీయాలతో పాటు ధార్మిక, ఆధ్యాత్మిక వర్గాల్లో కలకలం రేపుతున్నాయి.
