పండుగ సీజన్‌లో సొంతూళ్లకు, విహారయాత్రలకు వెళ్లాలనుకునే విమాన ప్రయాణికులకు దేశీయ విమానయాన దిగ్గజం ఇండిగో గట్టి షాక్ ఇచ్చింది. దేశీయ, అంతర్జాతీయ రూట్లలో ప్రయాణించే తమ విమాన టికెట్లపై ఇంధన సర్‌ఛార్జ్ పెంచుతున్నట్లు సంస్థ అధికారికంగా ప్రకటించింది. విమాన ప్రయాణ దూరాల ఆధారంగా దేశీయ సర్వీసులపై ఈ సర్‌ఛార్జ్ పెంపు రూ. 100 నుండి రూ. 350 వరకు ఉండనుందని ఎయిర్‌లైన్స్ స్పష్టం చేసింది. గత కొన్ని నెలలుగా అంతర్జాతీయంగా నెలకొన్న భౌగోళిక ఉద్రిక్తతల కారణంగా ముడిచమురు ధరల్లో తీవ్ర అస్థిరత ఏర్పడింది.
Also Read : ఫ్లై దుబాయ్ విమాన ఘటన విచారణలో భయంకర నిజాలు..!
దీని ప్రభావంతో విమాన ఇంధనమైన ఏవియేషన్ టర్బైన్ ఫ్యూయల్ ధరలు నెలవారీ ప్రాతిపదికన ఏకంగా 14 శాతానికి పైగా పెరిగాయి. ఈ భారీ ధరల పెరుగుదల వల్ల గత దశాబ్ద కాలంలోనే ఏటీఎఫ్ అత్యంత గరిష్ట స్థాయికి చేరుకుందని, దీనివల్ల విమాన నిర్వహణ వ్యయంపై తీవ్రమైన భారం పడుతోందని ఇండిగో యాజమాన్యం వెల్లడించింది. ఈ నేపథ్యంలోనే ఇంధన భారాన్ని అధిగమించడానికి టికెట్ ధరలను స్వల్పంగా సవరించక తప్పలేదని ఎయిర్‌లైన్స్ పేర్కొంది.
Also Read : బొత్సను ఒంటరిని చేస్తున్న మేనల్లుడు..!
ఇండిగో ప్రకటించిన ఈ సవరించిన కొత్త ఇంధన సర్‌ఛార్జ్ ధరలు రేపటి నుండి చేసుకునే అన్ని కొత్త బుకింగ్‌లకు వర్తిస్తాయని సంస్థ స్పష్టం చేసింది. విమానయాన రంగంలో ఇంధన ఖర్చులే ప్రధాన పాత్ర పోషిస్తాయి కాబట్టి, ఇండిగో తీసుకున్న ఈ నిర్ణయం వల్ల రాబోయే రోజుల్లో ఇతర విమానయాన సంస్థలు కూడా ఇదే బాటలో నడిచే అవకాశం ఉందని మార్కెట్ నిపుణులు అంచనా వేస్తున్నారు. దసరా, దీపావళి పండుగల సమయంలో విమాన ప్రయాణాలు చేసే మధ్యతరగతి ప్రజలపై ఈ నిర్ణయం అదనపు భారాన్ని మోపనుంది.
