ఏపీ డిప్యూటి సీఎం, జనసేన అధినేత పవన్ కల్యాణ్ సుమారు 25 రోజుల సుదీర్ఘ విరామం తర్వాత ఈరోజు మంగళగిరిలోని పార్టీ కేంద్ర కార్యాలయానికి చేరుకోనున్నారు. కేరళలో దాదాపు 20 రోజుల పాటు ఆయుర్వేద చికిత్స ముగించుకున్న ఆయన, నాలుగు రోజుల క్రితం హైదరాబాద్ చేరుకుని అక్కడ కొద్దిరోజులు విశ్రాంతి తీసుకున్నారు. దాదాపు నెల రోజులుగా పవన్ కల్యాణ్ ఏపీకి దూరంగా ఉండటంతో క్షేత్రస్థాయిలో పార్టీ కార్యక్రమాలు కాస్త మందగించాయని కార్యకర్తలు ఆవేదన వ్యక్తం చేస్తున్నారు.
Also Read : ఏపీలో మద్యం షాపుల లైసెన్స్ రెన్యూవల్కు కాసుల వర్షం..!
ఈ నేపథ్యంలో ఇకనుంచైనా ఆయన నిరంతరం మంగళగిరిలో అందుబాటులో ఉంటారని జనసేన నాయకులు, కార్యకర్తలు ఎంతో ఆశగా ఎదురుచూస్తున్నారు. మరోవైపు ఆంధ్రప్రదేశ్లో త్వరలో జరగబోయే స్థానిక సంస్థల ఎన్నికలకు సంబంధించిన కసరత్తు ప్రస్తుతం పొలిటికల్ సర్కిల్స్ లో అత్యంత సీరియస్ గా సాగుతోంది. మున్సిపల్, పంచాయతీ ఎన్నికల్లో జనసేన పార్టీ తరపున పోటీ చేసే అభ్యర్థుల ఎంపిక, బలాబలాలు ఉన్న స్థానాల గుర్తింపుపై పవన్ కల్యాణ్ ప్రత్యేక దృష్టి సారించనున్నారు. కూటమి భాగస్వామ్య పక్షాలైన టీడీపీ, బీజేపీలతో సీట్ల సర్దుబాటు మరియు క్షేత్రస్థాయి వ్యూహాలపై మంగళగిరి వేదికగా ఆయన వరుస సమీక్షలు నిర్వహించే అవకాశం ఉండటంతో ఏపీలో ఎన్నికల వేడి మరింత పెరిగింది.
Also Read : ఏపీ లిక్కర్ కుంభకోణం.. జగన్ కథ ముగిసినట్లేనా..?
ప్రభుత్వంలో కీలకమైన పంచాయతీ రాజ్, గ్రామీణాభివృద్ధి శాఖల మంత్రిగా ఉన్న పవన్ కల్యాణ్ రాకతో అటు పాలనాపరమైన ఫైళ్లు, ఇటు పార్టీ అంతర్గత వ్యవహారాలు ఊపందుకోనున్నాయి. గత కొన్ని వారాలుగా నియోజకవర్గాల్లో పెండింగ్ లో ఉన్న స్థానిక సమస్యలు, నామినేటెడ్ పదవుల భర్తీ ప్రక్రియపై ఆయన పార్టీ సీనియర్ నేతలతో చర్చించనున్నారు. పవన్ కల్యాణ్ రీ ఎంట్రీతో కూటమి ప్రభుత్వంలో పొలిటికల్ మైలేజ్ పెరగడమే కాకుండా, స్థానిక సంస్థల ఎన్నికల్లో క్లీన్ స్వీప్ చేసేలా జనసేన శ్రేణుల్లో సరికొత్త ఉత్సాహం రాబోతోందని రాజకీయ విశ్లేషకులు భావిస్తున్నారు.