వైఎస్ కుటుంబంలో ఆస్తుల పంపకానికి సంబంధించిన వివాదం మరోసారి చర్చకు వచ్చింది. కొన్ని నిర్దిష్ట ఆస్తులపై వైఎస్ షర్మిలకు ఎలాంటి హక్కు లేదని పేర్కొంటూ వైఎస్ భారతి ఈ నెల 24న ఆమెకు లేఖ రాశారు. ఆ ఆస్తులు తన పుట్టింటివారు బహుమతిగా ఇచ్చినవని, మరికొన్ని తన స్వయంకృషితో సంపాదించుకున్నవని భారతి లేఖలో పేర్కొన్నారు. కుటుంబంలో ఆస్తులపై జరుగుతున్న చర్చలు, వివాదాల నేపథ్యంలో షర్మిలకు స్పష్టత ఇచ్చేందుకే ఈ లేఖ రాస్తున్నట్లు భారతి తెలిపారు. కొన్ని నిర్దిష్ట ఆస్తులతో షర్మిలకు ఎలాంటి సంబంధం లేదని, వాటిపై హక్కులు కోరడం సరికాదని ఆమె తన వాదనను వినిపించారు.
Also Read : జగన్ అడ్డాలో కూటమి పాగా.. పులివెందులలో వైసీపీకి షాక్!
తన పుట్టింటి నుంచి వచ్చిన ఆస్తులతోపాటు, స్వయంగా సంపాదించుకున్న ఆస్తుల సంపాదనలోగానీ, నిర్మాణంలోగానీ వైఎస్ కుటుంబానికి ఎలాంటి భాగస్వామ్యం లేదని భారతి పేర్కొన్నారు. తన కష్టార్జితంతో సమకూర్చుకున్న ఆస్తులను కుటుంబ ఆస్తుల వివాదంలోకి తీసుకురావడం సరికాదని ఆమె అభిప్రాయపడ్డారు. పుట్టింటి వైపు నుంచి తనకు వచ్చిన ఆస్తులు, తన స్వార్జిత ఆస్తులపై షర్మిల హక్కులు కోరడాన్ని భారతి తప్పుబట్టారు. ఆయా ఆస్తుల విషయంలో తనను వివాదాల్లోకి లాగవద్దని లేఖలో కోరారు.
వైఎస్ కుటుంబంలో ఆస్తుల పంపకంపై వివాదం కొనసాగుతున్న నేపథ్యంలో, కొన్ని ఆస్తులు పూర్తిగా తనకు సంబంధించినవేనంటూ భారతి ఈ లేఖ ద్వారా తన వైఖరిని స్పష్టం చేశారు. క్కులు ఏ ప్రాతిపదికన నిర్ణయించాలన్నదే ప్రధాన వివాదంగా కనిపిస్తోంది. 2019 నాటి అవగాహన ఒప్పందం ప్రకారం ప్రేమాభిమానాలతో కొన్ని ఆస్తులు, వాటాలు షర్మిలకు బదలాయించాలని భావించానని, అయితే సంబంధిత న్యాయపరమైన అంశాలు పరిష్కారం కాకుండా బదలాయింపులు జరపడం సరికాదని జగన్ వాదించారు.
Also Read : షర్మిలకి అండగా లోకేష్‌.. సంచలన ట్వీట్‌..!
మరోవైపు, తండ్రి వైఎస్ రాజశేఖరరెడ్డి అభీష్టం మేరకు నలుగురు మనవలు, మనవరాళ్లకు సమానంగా వాటాలు దక్కాలని, ఒప్పందంలో పేర్కొన్న తన వాటాను ఇవ్వాలన్నది షర్మిల వాదన. ఈ నేపథ్యంలో, భారతి లేఖలోని అంశాలను బట్టి చూస్తే, తన పుట్టింటి నుంచి వచ్చినవి, స్వయంగా సంపాదించినవి కుటుంబ ఆస్తుల పరిధిలోకి రావన్న వాదనను ఆమె ముందుకు తెస్తున్నట్లు కనిపిస్తోంది. దీంతో చర్చ ‘ఎవరికి ఎంత వాటా?’ అన్న ప్రశ్నతోపాటు ‘ఏవి కుటుంబ ఆస్తులు, ఏవి వ్యక్తిగత ఆస్తులు?’ అన్న అంశం చుట్టూ మరింత కేంద్రీకృతమయ్యే అవకాశం ఉంది.
అయితే, భారతి పేర్కొన్న ఆస్తులు గత ఒప్పందాల్లో ఉన్నవేనా, వాటి యాజమాన్య పత్రాలు ఏమి చెబుతున్నాయన్న స్పష్టత లేకుండా, ఈ లేఖతోనే ఎవరి హక్కులపైనా తుది నిర్ధారణకు రావడం సాధ్యం కాదు.
