ఆంధ్రప్రదేశ్‌లో స్థానిక సంస్థల ఎన్నికల సందడి మొదలైంది. ఎన్నికల షెడ్యూల్ విడుదలైన నేపథ్యంలో ప్రధాన రాజకీయ పార్టీలు అభ్యర్థుల ఎంపిక, స్థానాల కేటాయింపుపై కసరత్తును వేగవంతం చేశాయి. అధికార కూటమిలోని తెలుగుదేశం, జనసేన, బీజేపీ మధ్య సీట్ల సర్దుబాటు చర్చలు కీలక దశకు చేరినట్లు తెలుస్తోంది. ఏ పార్టీ ఎన్ని స్థానాల్లో పోటీ చేయాలనే అంశంపై దాదాపు ఒక అవగాహనకు వచ్చినట్లు సమాచారం. మరోవైపు వైసీపీ కూడా అభ్యర్థుల జాబితాను సిద్ధం చేస్తున్నట్లు ప్రచారం జరుగుతోంది. ఈ నేపథ్యంలో కూటమిలో జనసేనకు దక్కిన స్థానాలెన్ని..? పవన్ కల్యాణ్ ఆశించిన మేరకు సీట్లు వచ్చాయా..? బీజేపీకి ఎలాంటి ప్రాధాన్యం లభించింది..? అన్న ప్రశ్నలు రాజకీయ వర్గాల్లో చర్చనీయాంశంగా మారాయి.
Also Read : అర్ధరాత్రి ట్వీట్ చేసిన జగన్.. క్యాడర్ కు లీకులు ఇస్తున్నట్టా..?
2024 ఎన్నికల్లో అనుసరించిన సీట్ల వంపిణీ సూత్రాన్నే స్థానిక ఎన్నికల్లోనూ అమలు చేయాలన్నది తమ వైఖరి కాదని, క్షేత్రస్థాయిలో పార్టీ బలం ఉన్న ప్రాంతాల్లో పోటీకి అవకాశం కల్పించాలని జనసేన నేతలు మొదటి నుంచీ చెబుతున్నారు. ఈ క్రమంలో తమకు గణనీయమైన వాటా దక్కాలన్న డిమాండ్‌ను తెరపైకి తెచ్చారు. మంత్రి కందుల దుర్గేశ్ సహా పలువురు జనసేన నాయకులు తమ పార్టీకి 40 శాతం వరకు స్థానాలు కేటాయించాలన్న అభిప్రాయాన్ని సోషల్ మీడియా వేదికగా వ్యక్తం చేశారు. సీట్ల సర్దుబాటుపై చర్చలు సాగుతున్న సమయంలో జనసేన అధినేత పవన్ కల్యాణ్ తమ పార్టీకి కేటాయించే స్థానాల విషయంలో పట్టుదలగా వ్యవహరించినట్లు తెలుస్తోంది. అయితే, చివరకు ఏ పార్టీకి ఎన్ని స్థానాలు దక్కాయనే దానిపై అధికారిక ప్రకటన వెలువడాల్సి ఉంది. అప్పటివరకు ప్రచారంలో ఉన్న సంఖ్యలను తుది నిర్ణయంగా భావించలేని పరిస్థితి.
విశ్వసనీయ సమాచారం ప్రకారం విజయవాడ, కాకినాడ, శ్రీకాకుళం, ఏలూరు నగరపాలక సంస్థలను జనసేనకు కేటాయించే అంశంపై అవగాహన కుదిరినట్లు తెలుస్తోంది. తిరుపతి కార్పొరేషన్ విషయంలోనూ చర్చలు జరిగినట్లు సమాచారం. అయితే, ఈ వివరాలపై అధికారిక ప్రకటన రావాల్సి ఉంది. మున్సిపాలిటీల విషయానికొస్తే పిఠాపురం, పెద్దాపురం, గొల్లప్రోలు, తుని, అమలాపురం, మండపేట, నిడదవోలు, జంగారెడ్డిగూడెం, భీమవరం, నరసాపురం, తాడేపల్లిగూడెం, రంపచోడవరం, జగ్గయ్యపేట, రేపల్లె, తెనాలి, పొన్నూరు, నరసరావుపేట, సత్తెనపల్లి, దర్శి, కావలి, శ్రీకాళహస్తి, మదనపల్లె, పుట్టపర్తి, ఆదోని తదితర పట్టణాల పేర్లు చర్చల్లోకి వచ్చినట్లు ప్రచారం జరుగుతోంది. నగర పంచాయతీల్లో పాలకొండ, నెల్లిమర్ల, ముమ్మిడివరం, మడకశిర స్థానాలను పరిశీలిస్తున్నట్లు సమాచారం. మొత్తంగా జనసేనకు నాలుగు కార్పొరేషన్లు, 20 నుంచి 24 మున్సిపాలిటీలు, మూడు నుంచి నాలుగు నగర పంచాయతీలు దక్కుతాయనే అంచనాలు వినిపిస్తున్నాయి.
జనసేనకు కొన్ని ప్రధాన పట్టణాల్లో అవకాశం లభించవచ్చన్న ప్రచారం ఒకవైపు సాగుతుండగా, మరోవైపు కేటాయింపుల లెక్కలపై భిన్నాభిప్రాయాలు వ్యక్తమవుతున్నాయి. ప్రచారంలో ఉన్న కార్పొరేషన్లలో కాకినాడ, శ్రీకాకుళం వంటి ప్రాంతాల్లో ప్రస్తుత ఎన్నికల షెడ్యూల్, ఎన్నికల పరిధి ఎలా ఉన్నాయన్న అంశం కూడా ప్రాధాన్యం సంతరించుకుంది. అందువల్ల కేవలం కార్పొరేషన్ల సంఖ్య ఆధారంగా జనసేనకు దక్కిన వాటాను అంచనా వేయడం కంటే, వాస్తవంగా ఎన్నికలు జరిగే స్థానాలు, వాటి ప్రాధాన్యం, ఇతర పార్టీలకు కేటాయించిన స్థానాలను కలిపి పరిశీలించాల్సి ఉంటుంది. మున్సిపల్ స్థానాల సర్దుబాటు ఒక దశకు చేరినా, జెడ్పీటీసీ, ఎంపీటీసీ స్థానాల పంపిణీపై చర్చలు ఇంకా ప్రాధాన్యం సంతరించుకోనున్నాయి. గ్రామీణ ప్రాంతాల్లో పార్టీ బలం, స్థానిక నాయకుల ప్రభావం, గత ఎన్నికల ఫలితాలు, అభ్యర్థుల గెలుపు అవకాశాలు వంటి అంశాలు ఈ చర్చల్లో కీలకంగా మారనున్నాయి.
Also Read : వంశీపై యార్లగడ్డ సంచలన కామెంట్స్..!
కూటమిలో సీట్ల సర్దుబాటు కేవలం సంఖ్యల వ్యవహారం మాత్రమే కాదు. మూడు పార్టీల మధ్య సమన్వయం, స్థానిక నాయకత్వానికి లభించే ప్రాధాన్యం, ఆశావహుల అంచనాలు. క్షేత్రస్థాయిలో పార్టీల బలం వంటి అంశాలు కూడా ఫలితాన్ని ప్రభావితం చేయనున్నాయి. జనసేనకు ఎన్ని స్థానాలు దక్కాయన్న దానితోపాటు, ఏయే ప్రాంతాల్లో పోటీ చేసే అవకాశం లభించిందన్నది కూడా కీలకమే. అయితే స్థానాల పంపిణీ పూర్తయిందనే ప్రచారం ఒక్కటే ఎన్నికల ఫలితాలకు కొలమానం కాదు. అభ్యర్థుల ఎంపిక, తిరుగుబాటు అభ్యర్థుల ప్రభావం, స్థానిక సమస్యలు, పార్టీల మధ్య సమన్వయం వంటి అంశాల పైనా ఎన్నికల ఫలితాలు ఆధారపడి ఉంటాయి. ఈ నేపథ్యంలో అధికారిక తుది జాబితా వెలువడిన తర్వాతే జనసేనకు దక్కిన వాటా, కూటమిలో బీజేపీకి లభించిన ప్రాధాన్యం.. మూడు పార్టీల మధ్య కుదిరిన సర్దుబాటుపై పూర్తి స్పష్టత వచ్చే అవకాశం ఉంది.
