అంతర్జాతీయ రాజకీయాల్లో ఒక ఊహించని పరిణామం చోటుచేసుకుంది. అమెరికా అధ్యక్షుడు డోనాల్డ్ ట్రంప్ రష్యాతో ఒక భారీ చమురు ఒప్పందాన్ని కుదుర్చుకున్నారు. అమెరికా మరియు ప్రపంచ మార్కెట్లలో పెరిగిపోతున్న ఇంధన ధరలను అదుపు చేయడమే లక్ష్యంగా, రష్యా నుంచి భారీ ఎత్తున డీజిల్‌ను విడుదల చేసేందుకు ఆ దేశ అధ్యక్షుడు వ్లాదిమిర్ పుతిన్ అంగీకరించినట్లు ట్రంప్ స్వయంగా ప్రకటించారు. ఇరాన్‌తో నెలకొన్న యుద్ధ వాతావరణం కారణంగా ప్రపంచవ్యాప్తంగా చమురు సంక్షోభం తలెత్తిన వేళ ఈ కీలక ఒప్పందం కుదరడం గమనార్హం.
Also Read : సచివాలయ ఉద్యోగుల గుండెల్లో రైళ్ళు.. అసలేం జరుగుతోంది..?
ఈ ఒప్పందం ప్రకారం, రష్యా తక్షణమే 3 లక్షల టన్నుల డీజిల్ ఇంధనాన్ని అమెరికా, అంతర్జాతీయ మార్కెట్లకు సరఫరా చేయనుంది. ఆ తర్వాత నవంబర్ నెలలో మరో 5 లక్షల టన్నులు, ఆపై 10 లక్షల టన్నుల డీజిల్‌ను విడతలవారీగా రష్యా విడుదల చేయనుంది. ఈ చమురు వ్యాపారానికి వీలుగా అమెరికా ఆర్థిక శాఖ రష్యా డీజిల్‌పై ఉన్న ఆంక్షలను తాత్కాలికంగా సడలిస్తూ, ఏప్రిల్ 2027 వరకు గడువుతో ప్రత్యేక లైసెన్స్ జారీ చేసింది. అయితే 2022లో ఉక్రెయిన్‌పై రష్యా దాడి చేసినప్పటి నుంచి అమెరికా దానిపై అనేక ఆంక్షలు విధిస్తూ వస్తోంది.
Also Read : విశాఖ బ్రాండ్ మార్పు.. ఇక ఏఐపట్నం..!
ఇప్పుడు ట్రంప్ హఠాత్తుగా ఆంక్షలు సడలించి పుతిన్‌తో చేతులు కలపడాన్ని ఉక్రెయిన్ అధ్యక్షుడు వోలోడిమిర్ జెలెన్స్కీ తీవ్రంగా తప్పుపట్టారు. ట్రంప్ తీసుకున్న ఈ నిర్ణయం అత్యంత బలహీనమైనది అని మండిపడ్డారు. అమెరికా వంటి భాగస్వామ్య దేశానికి ఇది అగౌరవమైన చర్య అంటూ జెలెన్స్కీ అసంతృప్తి వ్యక్తం చేశారు. అమెరికాలో త్వరలో జరగబోయే మధ్యంతర ఎన్నికలను దృష్టిలో ఉంచుకునే ట్రంప్ ఈ నిర్ణయం తీసుకున్నట్లు విశ్లేషకులు భావిస్తున్నారు. అక్కడ నిత్యావసరాలు, ఇంధన ధరలు ఆకాశాన్నంటడంతో ఓటర్లలో తీవ్ర వ్యతిరేకత వ్యక్తమవుతోంది. ఇరాన్ సంక్షోభం వల్ల అమెరికాలో గ్యాసోలిన్ ధరలు 46 శాతం, డీజిల్ ధరలు 67 శాతం పెరిగాయి. ఈ నేపథ్యంలో దేశంలోని రైతులు, వ్యాపారులు, ట్రక్కర్లకు తక్కువ ధరకే ఇంధనం అందించడమే తన మొదటి ప్రాధాన్యత అని ట్రంప్ సోషల్ మీడియా వేదికగా తన నిర్ణయాన్ని సమర్థించుకున్నారు.
