తెలంగాణలో రానున్న రోజుల్లో తీవ్ర నీటి కొరత, విద్యుత్ సంక్షోభం తలెత్తే ప్రమాదం ఉందని రాష్ట్ర రెవెన్యూ శాఖ మంత్రి పొంగులేటి శ్రీనివాస్ రెడ్డి, వ్యవసాయ శాఖ మంత్రి తుమ్మల నాగేశ్వరరావు హెచ్చరించారు. ఖమ్మం జిల్లా పాలేరు నియోజకవర్గంలో జరిగిన ఒక కార్యక్రమంలో పాల్గొన్న మంత్రి పొంగులేటి.. ప్రపంచవ్యాప్తంగా ప్రభావం చూపుతున్న ఎల్ నినో పరిస్థితుల వల్ల రాష్ట్రంలో సాగునీటికే కాదు, తాగునీటికి కూడా ఇబ్బందులు వచ్చే అవకాశం ఉందని ఆందోళన వ్యక్తం చేశారు. రైతులు ఎవరూ తొందరపడి రెండో పంట వేసి నష్టపోవద్దని, ప్రస్తుతం పొలాల్లో ఉన్న మొదటి పంటను కాపాడటమే ప్రభుత్వ ప్రథమ ప్రాధాన్యతని స్పష్టం చేశారు.
Also Read : ఎన్టీఆర్ కట్టించిన ఇల్లు.. ప్రజల కోసం బాలయ్య కీలక నిర్ణయం
మంత్రి చేసిన ఈ వ్యాఖ్యల వెనుక ఉన్న గ్రౌండ్ రియాలిటీ, అధికారిక గణాంకాలతో కూడిన వాస్తవ సమాచారం ఒకసారి చూస్తే.. మంత్రుల హెచ్చరికలు కేవలం ఊహాగానాలు కావు అంటున్నారు నిపుణులు. అధికారిక వాతావరణ నివేదికలు కూడా ఇదే విషయాన్ని స్పష్టం చేస్తున్నాయి. ఇటీవల ముగిసిన నైరుతి రుతుపవనాల సీజన్‌లో రాష్ట్రంలో సాధారణం కంటే 17 శాతం తక్కువ వర్షపాతం నమోదైంది. రాష్ట్రంలోని మొత్తం 33 జిల్లాలకు గాను 18 జిల్లాల్లో వర్షపాతం తీవ్రంగా క్షీణించింది. దాదాపు 215 నుండి 235 మండలాల్లో కరువు లాంటి పరిస్థితులు ఉన్నట్లు ప్రభుత్వ అంతర్గత సర్వేల్లో తేలింది.
రాష్ట్రంలోని ప్రధాన సాగునీటి ప్రాజెక్టులు మరియు రిజర్వాయర్లలో నీటి నిల్వలు గణనీయంగా తగ్గిపోయాయి. నాగార్జునసాగర్, శ్రీశైలం వంటి జలాశయాలతో పాటు మధ్యరహా, చిన్న తరహా ప్రాజెక్టుల్లో నీటి లభ్యత ఆశాజనకంగా లేదు. భూగర్భ జలమట్టాలు కూడా పడిపోతుండటంతో రాబోయే వేసవిలో తాగునీటి సరఫరాను మేనేజ్ చేయడం ప్రభుత్వానికి పెద్ద సవాలుగా మారనుంది. అందుకే సాగునీటి కంటే తాగునీటి అవసరాలకే తొలి ప్రాధాన్యత ఇవ్వాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు.
Also Read : వైసీపీ కుట్రలకు చంద్రబాబు చెక్‌.. BC లకే రికార్డు స్థానాలు
వర్షాలు లేకపోవడంతో రైతులు బోర్లపై ఆధారపడటం వల్ల విద్యుత్ వినియోగం విపరీతంగా పెరిగింది. అయితే, జలాశయాల్లో నీరు లేకపోవడంతో జల విద్యుత్ ఉత్పత్తి పూర్తిగా నిలిచిపోయింది. థర్మల్ పవర్ స్టేషన్లలో కూడా సింగరేణి బొగ్గు నిల్వల కొరత సమస్యగా మారింది. ప్రస్తుతం ఓపెన్ మార్కెట్‌లో విద్యుత్ కొనుగోలు చేయాలన్నా యూనిట్‌కు రూ. 15 వెచ్చించినా దొరకని తీవ్రమైన కొరత పరిస్థితులు మార్కెట్‌లో నెలకొన్నాయి. పరిస్థితి తీవ్రతను గమనించిన ముఖ్యమంత్రి రేవంత్ రెడ్డి.. తాగునీరు, విద్యుత్ సరఫరాకు ఆటంకం కలగకుండా ప్రత్యేక యాక్షన్ ప్లాన్ సిద్ధం చేయాలని అధికారులను అలర్ట్ చేశారు. అలాగే కేంద్ర ప్రభుత్వం నుండి ప్రత్యేక ఆర్థిక ప్యాకేజీని, ఉపాధి హామీ పనిదినాలను పెంచాలని కోరేందుకు ముఖ్యమంత్రి నేతృత్వంలోని ఒక క్యాబినెట్ బృందం త్వరలోనే ఢిల్లీ వెళ్లనుంది. ఈ విపత్కర పరిస్థితుల్లో ప్రజలందరూ నీటిని, విద్యుత్‌ను ఎంతో పొదుపుగా వాడుకోవాలని ప్రభుత్వం విజ్ఞప్తి చేస్తోంది.
