మాజీ మంత్రి వైఎస్ వివేకానందరెడ్డి హత్య కేసులో అప్రూవర్‌గా మారిన షేక్ దస్తగిరి తన భార్యతో కలిసి మంగళవారం సతీసమేతంగా సచివాలయానికి రావడం ఆంధ్రప్రదేశ్ రాజకీయ వర్గాల్లో తీవ్ర కలకలం రేపింది. తమ ప్రాణాలకు ముప్పు ఉందని, తమను నిరంతరం ఇబ్బంది పెడుతున్న వారిపై తక్షణమే కఠిన చర్యలు తీసుకోవాలని కోరుతూ ముఖ్యమంత్రి చంద్రబాబు నాయుడిని కలిసి వినతిపత్రం అందజేశారు. గత వైసీపీ హయాంలో తనను జైల్లో పెట్టి చంపేస్తామని బెదిరించిన కొందరు అధికారులే, ఇప్పుడు కూటమి ప్రభుత్వం వచ్చినా కూడా ఇంకా సర్వీసుల్లో ఉంటూ తనను వేధింపులకు గురిచేస్తున్నారని దస్తగిరి ముఖ్యమంత్రి వద్ద ఆవేదన వ్యక్తం చేశారు.
Also Read : బీఆర్ఎస్ ఎమ్మెల్సీలను వేటాడిన పోలీసులు.. నోటి దూలకు రియాక్షన్..!
అమరావతి సెక్రటేరియట్ వేదికగా మీడియా ప్రతినిధులతో మాట్లాడిన దస్తగిరి.. వైఎస్ జగన్ మోహన్ రెడ్డి వైఖరిపై తీవ్రస్థాయిలో ధ్వజమెత్తారు. “జగన్ మోహన్ రెడ్డి రాష్ట్ర సంక్షేమం, న్యాయం గురించి మాట్లాడే ముందు.. సొంత బాబాయి కుమార్తె అయిన వైఎస్ షర్మిలకు, డాక్టర్ సునీతారెడ్డికి జరిగిన అన్యాయంపై సమాధానం చెప్పాలి, వారికి ముందుగా న్యాయం చేయాలి” అని డిమాండ్ చేశారు. వివేకా హత్య వెనుక ఉన్న అసలైన వాస్తవాలు, ఈ కేసులో జరిగిన కోట్లాది రూపాయల మనీలాండరింగ్ లావాదేవీలకు సంబంధించిన పూర్తి గుట్టు మరియు ఆధారాలను త్వరలోనే ముఖ్యమంత్రి చంద్రబాబుకి స్వయంగా అందజేస్తానని సంచలన ప్రకటన చేశారు.
Also Read : కోల్పోయిన చోటే వెతుక్కున్న ఇషాన్ కిషన్.. ఇది కదా కమ్ బ్యాక్..!
ఈ కేసులో అసలైన సూత్రధారులు మరియు పాత్రధారుల వివరాలన్నీ తన వద్ద సిద్ధంగా ఉన్నాయని, ఈ కుట్రలో ఎవరెవరు భాగస్వాములయ్యారనే విషయాలను పక్కాగా బయటపెడతానని దస్తగిరి స్పష్టం చేశారు. ఒకవైపు సీబీఐ విచారణ తుది దశకు చేరుకుంటున్న తరుణంలో, అప్రూవర్ దస్తగిరి నేరుగా సచివాలయానికి వచ్చి ముఖ్యమంత్రిని కలవడం మరియు మనీలాండరింగ్ ఆధారాలను ఇస్తానని చెప్పడం పులివెందుల రాజకీయాలతో పాటు ఏపీ వ్యాప్తంగా తీవ్ర ఉత్కంఠను రేపుతోంది.
