చిన్న పిల్లల్లో దగ్గు, జలుబు, ముక్కు బ్లాక్ అవ్వడం వంటి సమస్యల కోసం వాడే కొన్ని రకాల కాంబినేషన్ సిరప్లపై కేంద్ర ప్రభుత్వం కీలక ఆంక్షలు విధించింది. ‘క్లోర్ఫెనిరమైన్ మేలియేట్’ మరియు ‘ఫెనైల్ ఎఫ్రిన్ హైడ్రోక్లోరైడ్’ కలిపి ఉండే స్థిర-డోస్ కాంబినేషన్ మందులను 4 సంవత్సరాల కంటే తక్కువ వయస్సు ఉన్న చిన్నారులకు ఉపయోగించరాదని కేంద్రం స్పష్టం చేసింది. డ్రగ్స్ టెక్నికల్ అడ్వైజరీ బోర్డ్ మరియు నిపుణుల కమిటీ ఇచ్చిన సిఫార్సుల మేరకు ప్రభుత్వం ఈ నిర్ణయం తీసుకుంది.
Also Read : లిక్కర్ స్కామ్లో మాజీ మంత్రి అరెస్ట్.. నెక్ట్స్ బిగ్బాస్?
ఈ కాంబినేషన్ మందుల వల్ల చిన్న పిల్లల్లో దుష్ప్రభావాలు వచ్చే అవకాశం ఉందని, వీటికి ప్రత్యామ్నాయంగా సురక్షితమైన ఇతర మందులు అందుబాటులో ఉన్నాయని నిపుణులు తేల్చారు. ఇకపై ఈ ఫార్ములేషన్తో మందులు తయారు చేసే కంపెనీలు తమ ప్యాకెట్లు, బాటిల్స్ మరియు ప్రచార సామాగ్రిపై “4 సంవత్సరాల లోపు పిల్లలకు ఉపయోగించరాదు” అని స్పష్టమైన హెచ్చరికను ముద్రించాలని కేంద్రం ఆదేశించింది. గత కొన్నేళ్లుగా భారతదేశంలో కఫ్ సిరప్ల నాణ్యత, వాటి వల్ల జరిగిన కొన్ని విషాద సంఘటనల నేపథ్యంలో ప్రభుత్వం ఈ చర్యలు చేపడుతోంది.
Also Read : ఏపీ సంక్షేమ పథకాలే స్ఫూర్తిగా..? విజయ్ కీలక ప్రకటన..!
గతంలో మధ్యప్రదేశ్లో కలుషిత దగ్గు మందు తాగి కొందరు పిల్లలు మరణించిన ఘటనలు, అలాగే కొన్ని సిరప్లలో ఇథిలీన్ గ్లైకాల్, డైథిలీన్ గ్లైకాల్ వంటి విషపూరిత రసాయనాలు బయటపడటాన్ని ప్రభుత్వం తీవ్రంగా పరిగణించింది. ఇందులో భాగంగానే ఈ ఏడాది జూన్ నుంచి సిరప్ ఆధారిత మందులను ఓవర్-ది-కౌంటర్ మార్గం నుంచి తొలగించి, కేవలం డాక్టర్ ప్రిస్క్రిప్షన్ ఉంటేనే మెడికల్ షాపుల్లో ఇచ్చేలా నిబంధన తెచ్చింది. అయితే ఈ తాజా ఉత్తర్వుల వల్ల అన్ని రకాల దగ్గు మందులను నిషేధించలేదని, కేవలం పైన పేర్కొన్న క్లోర్ఫెనిరమైన్ మరియు ఫెనైల్ ఎఫ్రిన్ కాంబినేషన్ ఉన్న వాటిపైనే ఆంక్షలు ఉన్నాయని గమనించాలి. సాధారణంగా వచ్చే దగ్గు, జలుబు వంటివి వైరల్ ఇన్ఫెక్షన్ల వల్ల వస్తుంటాయి కాబట్టి, అవి కొద్దిరోజుల్లో వాటంతట అవే తగ్గుతాయి. అందువల్ల పాత ప్రిస్క్రిప్షన్లు చూసిగానీ, లేదా మెడికల్ షాపుల వారి సలహాతో గానీ పిల్లలకు సొంతంగా మందులు వాడకూడదు.