ఐపీఎల్ చరిత్రలోనే అత్యధిక వికెట్లు తీసిన రికార్డు సృష్టించిన టీమిండియా స్టార్ స్పిన్నర్ యుజ్వేంద్ర చాహల్ తన వ్యక్తిగత జీవితంలోని చీకటి రోజులను మొదటిసారి బయటపెట్టాడు. మాజీ క్రికెటర్ ఆకాష్ చోప్రాతో జరిగిన ఒక పాడ్‌కాస్ట్‌లో చాహల్ మాట్లాడుతూ, తాను ఒకానొక దశలో తీవ్రమైన మద్యం వ్యసనానికి లోనయ్యానని సంచలన విషయాలు వెల్లడించాడు. 2023 కౌంటీ క్రికెట్ ఆడిన తర్వాత ఈ అలవాటు హద్దులు దాటిపోవడంతో, తానే స్వయంగా ఒక రిహాబిలిటేషన్ సెంటర్‌లో చేరి 26 రోజుల పాటు చికిత్స తీసుకున్నట్లు చాహల్ పేర్కొన్నాడు.
Also Read : జనసేన పోటీ సీట్లపై పవన్ లెక్క తేలిందా..?
తన వైవాహిక జీవితంలో ఎదురైన విడాకులు, ఆ తర్వాత సోషల్ మీడియాలో వచ్చిన విమర్శల వల్ల మానసిక స్థితి పూర్తిగా దెబ్బతిన్నట్లు చాహల్ ఆవేదన వ్యక్తం చేశాడు. ఆ సమయంలో తీవ్రమైన ఆందోళన, భయాందోళనలు తనను వేధించాయని చెప్పాడు. పానిక్ అటాక్ వచ్చినప్పుడు తన ముఖం ఒక పక్కకు లాగేసేదని, కనీసం మాట్లాడటానికి కూడా వీలుపడేది కాదని ఆ భయానక రోజులను గుర్తుచేసుకున్నాడు. ఈ మానసిక ఒత్తిడి కారణంగానే తాను క్రికెట్‌కు తాత్కాలికంగా బ్రేక్ తీసుకోవాల్సి వచ్చిందని వివరించాడు.
Also Read : ఏపీపీఎస్సీ గ్రూప్-1 మెయిన్స్ వివాదం.. రంగంలోకి ఈడీ..!
అయితే, ఈ విపత్కర పరిస్థితుల్లో తన కుటుంబం, ప్రాణ స్నేహితుడు తనకు అండగా నిలిచారని చాహల్ తెలిపాడు. మద్యం అలవాటును పూర్తిగా వదిలేయాలనే నిర్ణయం తన జీవితాన్ని మార్చేసిందని, ప్రస్తుతం తాను మానసికంగా ఎంతో పరిణతి సాధించి ప్రశాంతంగా ఉన్నట్లు వెల్లడించాడు. క్రికెట్‌ను అమితంగా ప్రేమించే తాను, వ్యసనం వల్ల కెరీర్‌ను నాశనం చేసుకోకూడదనే ఉద్దేశంతోనే ఈ మార్పు వైపు అడుగులు వేశానని, ఇప్పుడు పూర్తి ఫిట్‌నెస్‌తో సంతోషంగా ఉన్నానని ఈ స్టార్ స్పిన్నర్ స్పష్టం చేశాడు.
