ఆంధ్రప్రదేశ్ లో త్వరలో జరగబోయే స్థానిక సంస్థల ఎన్నికలకు సంబంధించి వెనుకబడిన తరగతుల రిజర్వేషన్లపై సీఎం చంద్రబాబు నాయుడు అధ్యక్షతన శనివారం జరిగిన రాష్ట్ర మంత్రివర్గ సమావేశం కీలక నిర్ణయం తీసుకుంది. రాజీవ్ రంజన్ మిశ్రా అధ్యక్షతన ఏర్పాటైన స్వతంత్ర ప్రత్యేక డెడికేటెడ్ కమిషన్ సర్వే, నివేదిక ఆధారంగా రాష్ట్రంలో బీసీ రిజర్వేషన్ల ఖరారుకు కేబినెట్ ఆమోద ముద్ర వేసింది. మొత్తం 8 కేటగిరీలుగా విభజించి ఏ ఏ స్థానాలకు ఎంత శాతం చొప్పున బీసీ రిజర్వేషన్లు దక్కబోతున్నాయనే పూర్తి వివరాలను రాష్ట్ర మంత్రి అచ్చెన్నాయుడు అధికారికంగా మీడియాకు వెల్లడించారు.
ప్రభుత్వం ప్రకటించిన అధికారిక వివరాల ప్రకారం పట్టణ, గ్రామీణ స్థానిక సంస్థల్లో రిజర్వేషన్ల శాతాలు ఈ విధంగా ఉన్నాయి. నగరపాలక సంస్థల మేయర్ ఎన్నికల్లో బీసీలకు అత్యధికంగా 35.29 శాతం రిజర్వేషన్లు దక్కనున్నాయి. అలాగే మున్సిపల్ చైర్మన్ ఎన్నికల్లో 33.02 శాతం మరియు అర్బన్ వార్డుల ఎన్నికలలో 32.78 శాతం సీట్లను బీసీ అభ్యర్థులకు కేటాయించనున్నారు. గతంలో ప్రకటించిన 34 శాతం కోటా కంటే కొన్ని స్థానాల్లో మరింత ఎక్కువ రిజర్వేషన్లు దక్కుతున్నాయని మంత్రి స్పష్టం చేశారు.
ఇక గ్రామీణ స్థానిక సంస్థల పరిధిలోకి వస్తే గ్రామ పంచాయతీ వార్డు సభ్యుల స్థానాల్లో బీసీలకు 26.73 శాతం రిజర్వేషన్లు కల్పించనున్నారు. గ్రామాల వారీగా సర్పంచ్ ఎన్నికల్లో 27.95 శాతం సీట్లు బీసీలకు దక్కనున్నాయి. వీటితో పాటుగా మండల ప్రజా పరిషత్, జిల్లా ప్రజా పరిషత్ ప్రాంతీయ నియోజకవర్గాల ఎన్నికల్లో 24.6 శాతం సీట్లు కేటాయించారు. అలాగే కీలకమైన జిల్లా పరిషత్ చైర్మన్ ఎన్నికల్లో 23.08 శాతం సీట్లను బీసీలకు ఇవ్వనున్నారు.
రాష్ట్రవ్యాప్తంగా రాజకీయంగా బీసీలకు సముచిత స్థానం మరియు తగిన ప్రాధాన్యత కల్పించడమే కూటమి ప్రభుత్వ ప్రధాన ధ్యేయమని ఈ సందర్భంగా మంత్రులు స్పష్టం చేశారు. అధికారికంగా ఏ ఏ స్థానాలకు ఎంత శాతం దక్కుతుందో కమిషన్ నివేదిక ప్రకారం తేల్చిన ప్రభుత్వం పార్టీ పరంగా మాత్రం బీసీలకు 34 శాతం రిజర్వేషన్లు ఇస్తామని భరోసా ఇచ్చింది. రాష్ట్రంలో ఎన్నికల నోటిఫికేషన్ ఎప్పుడైనా రావచ్చునని స్థానిక ఎన్నికల నిర్వహణకు ప్రభుత్వం పూర్తి స్థాయిలో సిద్ధంగా ఉందని అధికార వర్గాలు స్పష్టం చేశాయి.
