ప్రపంచ ప్రసిద్ధ జపనీస్ కార్ల తయారీ సంస్థలైన హోండా మరియు నిస్సాన్ ఆటోమొబైల్ రంగంలో సరికొత్త విప్లవానికి శ్రీకారం చుట్టాయి. నెక్స్ట్ జనరేషన్ ‘సాఫ్ట్‌వేర్-డిఫైన్డ్ వెహికల్స్’ సాంకేతికతను సంయుక్తంగా అభివృద్ధి చేసేందుకు ఈ రెండు దిగ్గజాలు ఒక చారిత్రాత్మక ఉమ్మడి ఒప్పందంపై సంతకాలు చేశాయి. మారుతున్న కాలానికి అనుగుణంగా కార్లలో సాఫ్ట్‌వేర్ ప్రాధాన్యత విపరీతంగా పెరుగుతున్న నేపథ్యంలో, సరికొత్త వాహనాల రూపకల్పనకు ఈ భాగస్వామ్యం అత్యంత కీలకంగా మారనుంది.
Also Read : మలేరియాపై భారత్ విజయం.. కేంద్రం కీలక ప్రకటన..!
ఈ ఒప్పందంలో భాగంగా రెండు కంపెనీలు కలిసి వాహనాలకు అవసరమైన ఎలక్ట్రానిక్ కంట్రోల్ యూనిట్లు, ఇన్-వెహికల్ ఆపరేటింగ్ సిస్టమ్, మిడిల్‌వేర్ భాగాలు మరియు వెహికల్ కంట్రోల్ సాఫ్ట్‌వేర్‌లను ఉమ్మడిగా అభివృద్ధి చేయనున్నాయి. ఇలా కోర్ ఎలక్ట్రానిక్స్ మరియు సాఫ్ట్‌వేర్ సిస్టమ్స్ కోసం ఒకే విధమైన పద్ధతిని అవలంబించడం ద్వారా రీసెర్చ్ ఖర్చులు భారీగా తగ్గడంతో పాటు, తక్కువ సమయంలోనే అత్యాధునిక సాంకేతికతను కస్టమర్లకు అందుబాటులోకి తీసుకురావచ్చని ఇరు సంస్థలు భావిస్తున్నాయి.
Also Read : బొత్స.. మైండ్ గేమ్ పాలిట్రిక్స్..!
ఈ కొత్త భాగస్వామ్యం ద్వారా రెండు కంపెనీల వనరులు ఒకచోటకు చేరనున్నాయి. ప్రస్తుతం రూపొందిస్తున్న ఈ సరికొత్త సాఫ్ట్‌వేర్ టెక్నాలజీలను ఇరు కంపెనీల ఎలక్ట్రికల్ అండ్ ఎలక్ట్రానిక్ ఆర్కిటెక్చర్‌లో విలీనం చేయనున్నారు. 2029 ఆర్థిక సంవత్సరం నుండి మార్కెట్లోకి రాబోయే హోండా, నిస్సాన్ నెక్స్ట్ జనరేషన్ సాఫ్ట్‌వేర్ వాహనాలలో ఈ అధునాతన వ్యవస్థలను ఉపయోగించాలని గట్టి ప్రణాళికలు సిద్ధం చేశారు. వాహనాల విద్యుద్దీకరణ, కార్బన్ ఉద్గారాల తగ్గింపు మరియు రోడ్డు ప్రమాదాల నివారణే లక్ష్యంగా ఈ రెండు కంపెనీలు భవిష్యత్తులో మరిన్ని సరికొత్త మొబిలిటీ సొల్యూషన్స్‌ను తీసుకురావడానికి కసరత్తు చేస్తున్నాయి.
