శ్రీసత్యసాయి జిల్లా కదిరి నియోజకవర్గ వైఎస్సార్ కాంగ్రెస్ పార్టీలో అంతర్గత విభేదాలు తారాస్థాయికి చేరాయి. స్థానిక మున్సిపల్ చైర్ పర్సన్ అభ్యర్థి తరఫున సాగుతున్న ఎన్నికల ప్రచారంలో పార్టీకి చెందిన కీలక నేతలు ముఖం చాటేయడం ఇప్పుడు నియోజకవర్గంలో తీవ్ర చర్చనీయాంశంగా మారింది. ఒకవైపు ప్రత్యర్థి పార్టీలను ఎదుర్కొనేందుకు క్యాడర్ సిద్ధమవుతుంటే, మరోవైపు అగ్రనేతల మధ్య ఉన్న ఈ ఆధిపత్య పోరు పార్టీ ఉనికిని దెబ్బతీస్తోందని క్షేత్రస్థాయి కార్యకర్తలు ఆందోళన వ్యక్తం చేస్తున్నారు.
Also Read : వైసీపీ నేతలు ఇప్పుడైనా నామినేషన్లు వేస్తారా..?
ఈ వర్గ రాజకీయాల నేపథ్యంలో నియోజకవర్గ సమన్వయకర్త ముక్బూల్ అహ్మద్, వైసీపీ రాష్ట్ర కార్యదర్శి పూల శ్రీనివాసరెడ్డి మధ్య బహిరంగంగానే తీవ్ర వాగ్వాదం చోటుచేసుకుంది. గత కొంతకాలంగా వీరి మధ్య నడుస్తున్న కోల్డ్ వార్ ఈ ప్రచార వేదికగా రచ్చకెక్కినట్లు తెలుస్తోంది. మరోవైపు, కదిరి మాజీ ఎమ్మెల్యే అత్తార్ చాంద్ బాషా అనుసరిస్తున్న వ్యూహాలు మరియు వ్యవహార శైలిపై కూడా సొంత పార్టీ నేతల్లోనే తీవ్ర అసహనం వ్యక్తమవుతోంది. నేతలంతా గ్రూపులుగా విడిపోయి సొంత కుంపట్లు పెట్టుకోవడంతో కదిరి వైసీపీ రాజకీయం కాస్తా మూడు ముక్కలాటగా మారిపోయింది.
Also Read : వైసీపీ నేతలకు రాచమర్యాదలు.. టీడీపీ శ్రేణులపై లాఠీఛార్జ్..!
నాయకుల మధ్య సాగుతున్న ఈ అంతర్గత కలహాలు మరియు సమన్వయ లోపం చూసి వైసీపీ కిందిస్థాయి క్యాడర్ తీవ్ర నిరాశలో మునిగిపోయి, తలలు పట్టుకుంటోంది. కీలకమైన ఎన్నికల సమయంలో నేతలు కలిసికట్టుగా ప్రచారం చేయాల్సింది పోయి, ఒకరిపై ఒకరు కత్తులు దూసుకోవడం వల్ల పార్టీకి కోలుకోలేని నష్టం వాటిల్లే ప్రమాదం ఉందని హెచ్చరిస్తున్నారు. ఇప్పటికైనా పార్టీ అధిష్ఠానం తక్షణమే జోక్యం చేసుకుని కదిరి నియోజకవర్గంలో నెలకొన్న ఈ వర్గపోరుకు బ్రేక్ వేయకపోతే, భవిష్యత్తులో భారీ మూల్యం చెల్లించుకోవాల్సి వస్తుందని రాజకీయ విశ్లేషకులు భావిస్తున్నారు.
